O xurado da XII edición do Premio Ramón Piñeiro de Ensaio decidiu, por maioría, outorgarlle o Premio Ramón Piñeiro de Ensaio, na súa duodécima edición, ao texto titulado Para que nos serve Galiza? de Xaime Subiela. Este premio está convocado pola Secretaría Xeral de Política Lingüística da Xunta de Galicia e Editorial Galaxia, co patrocinio de Gas Natural Fenosa.
O xurado, composto por Luís Alonso Girgado, Miguel Barros, Encarna Otero, Carme Vidal e Carlos Lema, valorou moi especialmente a modernidade da análise da situación actual de Galicia e o novidoso da formulación dos retos da sociedade galega de hoxe. O xurado recoñece así os méritos dunha obra na que unha cuestión sobranceira é a busca de alternativas colectivas conciliadoras arredor do concepto integrador de nación; cunha visión optimista de futuro.
Xaime Subiela Pérez (Chantada, 1969) é investigador social e consultor público, desde 2009 traballa como profesional autónomo. Licenciado en Ciencias Políticas e da Administración pola Universidade de Santiago de Compostela, actualmente é vicedecano do Colexio de politólogos/as e sociólogos/as de Galicia, amais de ser colaborador habitual da Radio Galega, e da revista Tempos Novos na que foi coordinador do Informe Galicia 2010.
O Premio Ramón Piñeiro de Ensaio naceu no ano 2000 en memoria do escritor, filósofo e galeguista Ramón Piñeiro e acóllese ao espírito que inspirou a súa traxectoria intelectual, coa intención de impulsar as formas de creación e expresión do pensamento libre e democrático, a precisión e o estilo da lingua galega e mais o debate e a reflexión arredor dos temas varios do noso tempo.