Todo listo para que arranque, o vindeiro venres 30 de novembro, o Cultural 2012 que, baixo o lema A casa da cultura é a túa casa, ti tes a chave desenvolverase no Pazo da Cultura de Pontevedra ata o domingo 2 de decembro.
Os visitantes poderán atopar nesta Feira das Industrias Culturais música, literatura, cine, televisión, teatro, danza, circo, maxia, novas tecnoloxías e todo un mundo de conexións entre elas.
O presidente do Culturgal Xulio Amigo incide no carácter “humilde, pero fermoso” de Culturgal, “o fogar da cultura galega”. Amigo salienta que, cun orzamento inicial de 250 mil euros (un 15% menos que en 2011), “Culturgal se constrúe cun 25% do orzamento medio de calquera outro evento similar a nivel estatal”. “O Mercat da Música Viva de Vic, a Fira Mediterrania, a Fira de Tárrega, a FICA de Andalucía... teñen orzamentos cercanos ao millón de euros, mesmo nestes tempos de crise”, recordou Amigo.
Xulio Amigo agradeceu o “patrocinio imprescindible” da Xunta de Galicia, do Concello de Pontevedra e do Ministerio de Cultura. A Xunta de Galicia segue sendo o patrocinador principal de Culturgal, achegando 150 mil euros a través de AGADIC e 20 mil a través da SXPL, a pesares de que esta achega se reduciu nun 26% (60.000 euros) con respecto a 2011. Pola súa banda, o Ministerio de Cultura duplica o seu aporte e chega aos 23 mil euros e o Concello de Pontevedra incrementou tamén o seu apoio nun 20%, ata os 36 mil euros.
Con 70 entidades expoñendo os seus produtos e servizos na feira, máis de 300 profesionais acreditados, unha programación profesional con máis de 40 de relatores nacionais e internacionais e máis de 140 actividades para todos os públicos, “o fogar da cultura galega que é Culturgal segue asentándose como o máis completo espazo de encontro e difusión do sector cultural galego”, segundo afirmou Sergio Lago, director da Feira.
Do programa xeral destácase o asento definitivo das conversas de salón, que este ano realizarán os xornalistas Xosé Manuel Pereiro, María Solar, Alberto Ramos e Belén López e que contarán coa presenza, entre outros moitos, de Luís Tosar, Ignacio Escolar, Agustín Fernández Paz, Manuel Lourenzo González, Teresa Moure, María Reimóndez e Rexina Vega. Tamén visitará o salón de Culturgal Manuel Rivas, que lerá un fragmento de As voces baixas e estarán presentes os e as autoras dos grandes premios e lanzamentos editoriais do ano.
No punto no que se tocan a literatura e as artes escénicas (cuxa presenza na feira segue medrando), Culturgal situarase como a porta de entrada ao ano de Roberto Vidal Bolaño, co lanzamento de varios proxectos de difusión da súa obra.
Culturgal está organizado por unha entidade da que forman parte as asociacións profesionais máis representativas do sector: Asociación Galega de Editores (AGE), Asociación Galega de Empresas de Artes Escénicas (Escena Galega), Asociación Galega de Produtoras Fonográficas (Agaphono), Empresas Galegas Adicadas a Internet e ás Novas Tecnoloxías (Eganet), Asociación Galega de Produtoras Independentes (Agapi). A Feira conta co patrocinio da Xunta de Galicia, a través da AGADIC e da Secretaría Xeral de Política Lingüística, do Concello de Pontevedra e do Ministerio de Educación, Cultura e Deporte e conta coa colaboración de máis de 30 entidades e empresas.