Hoxe principia o programa Atardecer no Gaiás, un ciclo de actuacións que se celebrarán todos os xoves, venres e sábados do 14 de xullo ao 10 de setembro na praza da Cidade da Cultura e que permitirá gozar dos seráns de verán mentres se escoitan concertos de estilos tan diferentes como o pop, o jazz, a música clásica, electrónica ou brasileira, espectáculos poéticos ou o relato dun contacontos.
Os espectáculos poéticos, con recitais musicados e novas formas de achegarse á poesía, serán outro dos eixes do ciclo. Polo Gaiás pasarán Xosé Carlos Caneiro, que presentará xunto ao guitarrista Xosé Manuel Salgado Camiño de amor e lúa. Atardecer no Gaiás contará tamén coa micro-poeta madrileña Ajo, fanática da brevidade na poesía e que estará acompañada polo clarinete de Judith Farres.
A poeta Yolanda Castaño, xunto ao compositor Isaac Garabato, e a alianza escénica que compoñen Olalla Cociña e Bernardo Martínez forman parte tamén desta selección dedicada á poesía, que convocará tamén nomes como o de María Lado e o músico Mig Seoane; o de Mercedes Villegas e Antonio Calvache ou os de Ugía Pedreira e Fred Martín, que presentarán Acróbata, un libro-musical onde o galego e portugués se dan a man sobre o escenario.
As persoas que asistan ao ciclo poderán escoitar tamén relatos breves, como os que narrará Rivadulla Corcón acompañado polo trompetista cubano Franky Valencia, que presentarán Moraima. Unha pequena vila de mar.
As actuacións, que serán de balde e sen necesidade de reservar praza, comezarán sempre ás 21.00 h. e terán unha duración aproximada de 90 minutos. Atardecer no Gaiás rematará o 10 de setembro cun espectáculo especial de peche de ciclo.