O vindeiro luns, 26 de outubro, terá lugar o regreso do ciclo Poetas Di(n)versos, tras doce anos xuntando na Coruña o mellor da poesía galega e internacional.
Coordinado pola poeta e xestora cultural Yolanda Castaño, o Centro Ágora da cidade herculina contará nesta nova edición coa participación do ourensán Ramón Caride, un dos autores máis prolíficos da nosa literatura, e a gran dama da poesía canaria, Elsa López. O ciclo continuará o 23 de novembro co italiano Ángelo Néstore e o noiés Ismael Ramos, que reescriben a masculinidade con moita sensibilidade e desde diversas perspectivas; para rematar o 14 de decembro coa bueuense Miriam Ferradáns e Xuan Bello, a voz máis importante da literatura en asturiano.
Na presentación do programa, a alcaldesa Inés Rey destacou que o éxito desta actividade, tras doce anos de percorrido, non era casualidade: "Quizais a enorme resposta da veciñanza se deba á orixinalidade da proposta que non se queda na posta en escena de escritoras e escritores do país. Búscaselles parella no estranxeiro, de xeito que a combustión das súas letras e das letras de máis aló resulta atractiva".
Pola súa parte, Yolanda Castaño afirmou que a actividade volve con toda a forza para xuntar o mellor da poesía de Galicia e de fóra. Canto á historiografía destes doce anos de Poetas Di(n)versos, lembrou que pode contar con dous escenarios distintos, catro corporacións municipais diferentes e ata unha pandemia mundial, "pero resiste sendo o único que invita unha figura internacional ao mes".
Por outro lado, Poetas Di(n)versos apoiase nas librarías coruñesas porque cada cita conta cun local da cidade que escolle os títulos da escritora ou do escritor en cuestión para ofrecerllos ao público.
