A Universidade de Santiago de Compostela, a través do reitor Juan Casares Long, fixo entrega onte martes ao escritor e académico Salvador García-Bodaño da Insignia de Ouro da Universidade.
Foi precisamente na Universidade onde García-Bodaño traspasou as fronteiras “da mera intimidade creadora cara á externacionalización dos resultados do exercicio da arte literaria” á vez que entraba en contacto con outros integrantes da Xeración das Festas Minervais entre os que nomeou a Bernardino Graña, Méndez Ferrín, Ramón Lorenzo, Franco Grande, Antón Concheiro, Pérez Barreiro, Alexandre Cribeiro e López-Casanova.
Segundo García-Bodaño tamén foi na USC onde tiveron lugar as experiencias “ primordiais” de difusión da súa obra. E citou tres: as Festas Minervais celebradas en fronte da Reitoría, no Hostal, especialmente a do 59 na que resultou premiado; a homenaxe no Paraninfo en memoria de Ramón Cabanillas no que leu parte dos seus primeiros poemas; e a participación na inauguración en 1963 do primeiro Día das Letras Galegas no Salón Artesoado de Fonseca.
Estes actos foron tamén lembrados polo reitor, para quen cada actividade na que participou o homenaxeado viña cargada “de intervencións cun inequívoco compromiso social e político co país”. Citou tamén Casares Long os faladoiros literarios no desaparecido Café Español, a fundación do Grupo O Galo que logo sería a asociación cultural pioneira en espallar a memoria histórica e mais a lingua e a cultura galegas, a súa participación no Consello da Mocidade e en 1963 como núcleo promotor do Partido Socialista Galego (PSG), a experiencia da edición da revista Teima (1976-77) ou a fundación da editorial Escola Aberta.
Salvador García-Bodaño, que en 1983 ingresa como membro numerario do novo Seminario de Estudios Galegos, participou na creación de relevantes empresas culturais como o Museo do Pobo Galego, a Asociación de Escritores en Lingua Galega, o PEN Clube de Galicia, a Asociación de Tradutores en Lingua Galega, o Museo de Arte Contemporánea Carlos Maside, o Instituto Galego da Información, a Fundación Castelao, a Asociación Galega do Libro Infantil e Xuvenil ou a Fundación Padroado do Pedrón de Ouro.