O concello de Noia acolleu este ano o fallo do Premio de Historia Medieval de Galicia 2011, convocado conxuntamente pola Editorial Toxosoutos e os concellos de Carnota, Muros, Outes, Lousame, Noia e Porto do Son.
O xurado, formado por Henrique Monteagudo, Xerardo Agrafoxo, Clodio González Pérez, Pedro García Vidal e Marcos Fernández Ferreiro, e actuando como secretario, sen voto, David G. Couso, acordaron por unanimidade outorgar o premio de Historia Medieval de Galicia correspondente a este ano á obra A nobreza na lírica galego-portiguesa, de Antonio Rey Somoza.
En valoración do xurado, a obra gañadora explora a información que ofrece o cancioneiro trobadoresco galego-portugués (no seu sector satírico) e as Cantigas de Santa María de Afonso X o Sabio, un corpus textual que corresponde á situación plenomedieval (século XIII) do centro e o occidente da Península ibérica. Igualmente o xurado salientou o traballo de Rey Somoza o seu carácter interdisciplinar,ao mostrar a utilidade da explotación dos textos literarios como fonte de información histórica, complementaria e nalgúns aspectos superior á obtida das fontes documentais tradicional. Desde o punto de vista do propio premio, A nobreza na lírica galego-portiguesa ten outra cualidade: abre as portas aos estudos que combinan a historiografía coa filoloxía, un aspecto previsto desde o comezo, pero ao que raramente se lle deu acollida.
A obra gañadora, amais do premio económico establecido nas bases do certame, publicarase en vindeiras datas na editorial noiesa Toxosoutos.