O Presidente da Asociación Galega de Editores, Manuel Bragado, e o Secretario Xeral de Cultura, Anxo Lorenzo, presentaron na Biblioteca da Cidade da Cultura, o Informe de Comercio Interior do Libro de Galicia. Os datos proceden das enquisas realizadas a unha mostra representativa de empresas do gremio editorial galego e reflicten a situación do sector en función da actividade editorial e da conxuntura económica do ano 2011.
Manuel Bragado manifestou que malia os datos, o sector resistía e mantiña a súa actividade produtiva e contribución ao incremento do catálogo editorial galego, coa achega cultural que iso supón. Amosou a súa preocupación pola redución do emprego, que afecta tanto a traballadores fixos como a colaboradores externos, e tamén pola caída da facturación, que provocou que o número de empresas que facturaban por enriba dos catro millóns de euros, pasaran de cinco a dúas en dous anos.
Anxo Lorenzo subliñou que o sector agremiado representa ao 80% do sector e que polo tanto a mostra recollida no informe e plenamente representativa pois descontando as cifras da edición institucional( 14%), o sector non agremiado acada o 10%.
O informe foi realizado pola consultora Conecta Research&Consulting, que elabora tamén os mesmos datos para a Federación de Gremios de Editores de España referentes ao conxunto de España. Del despréndese unha radiografía da situación da edición privada en Galicia que, segundo anunciou o secretario xeral de Cultura, "será unha base fundamental das próximas iniciativas que poñamos en marcha no sector editorial", entre as que destacou o Plan Director do Libro.
En 2011 editouse un 1,3% máis de títulos ca en 2010 e un 0,5% de exemplares menos, o que fai que diminuíse lixeiramente a tiraxe media ata o nivel de 2009. A facturación foi de 21,43 millóns de euros, que supón un 8,1% menos ca en 2010; vendéronse 1.534.409 exemplares, un 9,9% menos ca o exercicio anterior. O prezo medio, que descendeu entre 2009 e 2010, ascende en 2011 ata os 13,97 euros por exemplar.
O escenario por materias para a edición en galego das editoriais consideradas é similar ao observado para o total. A materia que máis factura é texto non universitario, que chega a representar o 52,9% do total. Sumándolle a cota de mercado de infantil e xuvenil (18,9%) e literatura (13,2%), obtense o 85,0% do total facturado en galego.