Gustavo Pernas Cora, coa obra Isobaras, é o gañador do XXI Premio Álvaro Cunqueiro para textos teatrais que organiza a Agadic (Axencia Galega das Industrias Culturais). A concesión do galardón foi comunicada hoxe canda a do X Barriga Verde de textos para teatro de monicreques na modalidade de rapaces, que recaeu en Raúl Dans por Un mosquito de nome Henri.

Os nomes de ambos gañadores foron desvelados polo profesor Manuel F. Vieites, presidente do xurado da edición 2012 dos catro premios literarios convocados, quen fixo público o ditame do tribunal no que se recolle igualmente a decisión de declarar desertos tanto o VII Manuel María de Literatura Dramática Infantil como a modalidade de textos para adultos do Barriga Verde.

Isobaras

Respecto a Isobaras, que segundo o propio Pernas pretende ser “un mapa do noso tempo” no que os seus oito personaxes reflicten unha sociedade que está ao límite, o xurado valorou “o interese da súa aposta formal, que foxe de convencionalismos para explorar outras posibilidades de expresión artística a través de monólogos que acaban confluíndo en diálogos e de conflitos individuais que acaban sendo colectivos”, como é o caso da exclusión social, a crise económica, a ameaza da guerra, a soidade, o fracaso, a falta de comunicación e a falta de identificación nos demais.

O tribunal subliña a actualidade do texto que, porén, propón unha visión sen restricións espaciais ou temporais, así como unha posta en escena sobria e evocadora. Destaca, asemade, “o coidado estilístico e un certo lirismo que lles aporta matices e profundidade aos personaxes e ás anotacións, sen renunciar por iso á crueza descarnada da exposición desas individualidades cara ao público nin moito menos ao ritmo e ao sentido do humor, pezas chave para que se establezan pontes co espectador”.

Vinculado profesionalmente ao teatro desde 1985, Gustavo Pernas é tamén profesor de Guión e Teatro na Escola de Imaxe e Son da Coruña. Como autor dramático ten no seu haber o Premio Compostela por O galego, a mulata e o negro (1990), o María Casares de Teatro por Ladraremos (1996), o Rafael Dieste por Footing (2001) e Final de película (2006); o Max de las Artes Escénicas por Paso de cebra (2004) e Final de película; e o Premio da Asociación de Escritores en Lingua Galega por Medidas preventivas (2007). Ademais, en 2008 foi recoñecido co Premio Roberto Vidal Bolaño pola súa traxectoria artística xunto a Anxela G. Abalo e Ancora Produccións. Este ano 2012 estreou coa súa compañía a peza Snakizados, última proposta da triloxía 3 logomonos, da que tamén forman parte Colgados (2009) e Pisados (2010).

Con este XXI Álvaro Cunqueiro, ao que optaban un total de 26 orixinais, Pernas Cora incorpórase á ampla nómina de autores que conseguiron este recoñecemento, dotándoo ao tempo dunha traxectoria de prestixio como o máis lonxevo de todos os convocados no seu ámbito en Galicia e referencial para a dramaturxia en galego: Marcos Abalde (2011), Manuel Lourenzo (2009), Teresa González Costa (2008), Roberto Salgueiro (2007, 2002, 2000 e 1998), Manuel Guede (2006), Rubén Ruibal (2005), Antón Lopo (2004), Siro López (2003), Afonso Becerra de Becerreá (2001), Manoel Riveiro (1993), Andrés A. Vila e Xosé Cid Cabido (1992), Roberto Vidal Bolaño (1991), Agustín Magán (1990), Euloxio R. Ruibal (1989) e o propio Raúl Dans (2010 e 1994).

Un mosquitro de nome Henri

Raúl Dans alzouse co Premio Barriga Verde de textos para teatro de monicreques, na categoría dirixida ao público infantil, con Un mosquito de nome Henri, unha historia de superación e de aprendizaxe protagonizada por un personaxe visionario e inconformista que soña con ser aviador pese ás dificultades coas que se topa.

Dela valora o xurado o seu ritmo áxil e a claridade da estrutura, así como a abundante comicidade nos textos e súa profundidade conceptual. O ditame refírese tamén aos numerosos e variados personaxes, coas súas singulares características, que conforman “un conxunto harmónico no cal se adoptan comportamentos e emocións propias dos seres humanos, de xeito que mosquitos, avespas, formigas e outros insectos se teñen que enfrontar a alegrías, frustracións, medos, ilusións e desenganos”.

No texto, que supón a primeira incursión de Dans na literatura dramática infantil, pódese entrever tamén unha crítica á sociedade de hoxe en día, ao tempo que se aprecia unha valoración positiva da vontade, a perseveranza e a realización persoal como obxectivo principal.

Dramaturgo, guionista audiovisual e actor de dobraxe, Raúl Dans comezou a súa traxectoria teatral como actor na histórica Compañía Luís Seoane. É tamén un dos integrantes do colectivo de intérpretes que iniciou a dobraxe en galego, oficio ao que se dedica sen interrupción desde 1985. Paralelamente, desenvolve unha sólida traxectoria como dialoguista, argumentista e creador de series de ficción para a televisión, así como guionista de cinema.

Este ano recibiu o premio da Asociación de Escritores de Lingua Galega ao mellor texto teatral editado en 2011 por Chegamos despois a unha terra gris, obra pola que en 2010 foi recoñecido por segunda vez co Álvaro Cunqueiro. A primeira fora en 1994 con Lugar, que o CDG levou a escena en 1999. Tamén obtivo o Rafael Dieste para Textos Teatrais por Matalobos (1993) e en 1997 gañou o prestixioso Premi Born con Derrota.

En 2008, Espiral Maior editou todo o teatro breve do autor nun volume titulado Nun mundo hostil, coincidindo coa publicación de Nachtmahr dentro da colección Biblioteca Dramática Galega, que coeditan a Agadic e Edicións Xerais e na que figuran, así mesmo, Derrota e Chegamos despois a unha terra gris.

O xurado destes premios estivo formado por Manuel F. Vieites, Paula Carballeira, Lola Correa, Celtia Figueiras, Xúlio Lago e Xesús Pisón.