O Concello de Ribadeo acaba de recibir unha doazón de máis de 6.300 libros e 900 revistas dos fondos de Daniel Cortezón, seguindo deste xeito as indicacións que o dramaturgo e escritor ribadense fixo antes do seu pasamento hai tres anos. O alcalde, Fernando Suárez Barcia, subliña que deste xeito a biblioteca municipal de Ribadeo se converte nunha das máis importantes da provincia.
O rexedor dixo que "cúmprense tres anos do pasamento de Daniel Cortezón e este persoeiro, xa en vida, deixou dito que precisamente moita da súa formación intelectual, moita da súa formación autodidacta foi adquirida das lecturas dos libros da biblioteca pública El Viejo Pancho de Ribadeo, e dixo que unha grande parte da súa colección de libros, que foi mercando, adquirindo e recollendo, quería que pasasen a engrosar os fondos da propia biblioteca El Viejo Pancho, como eterno agradecemento a Ribadeo por tela gozando cando era novo".
Foi a viúva de Cortezón quen fixo entrega ao longo destes últimos tempos os fondos, pero a semana pasada documentouse a través dun acta de doazón, unha primeira remesa de volumes. Son 6.385 libros e 907 revistas. Moitos son en galego, en castelán, en portugués, catalá, francés sobre diferentes temáticas. Agora máis para adiante virán máis libros do que foi a obra de Daniel Cortezón e unha colección de libros das Figueiras, de Castropol, de Ribadeo, da Veiga, do que el chamaba Comunidade cultural da ría. Cos fondos de Daniel Cortazón a biblioteca municipal El Viejo Pancho de Ribadeo chegará aos case 32.000 fondos, sendo unha das bibliotecas máis ricas e máis importantes de toda a provincia de Lugo.
