O xurado da XXV edición do Premio Nacional de Poesía Xosemaría Pérez Parallé acordou outorgar o premio deste ano á obra Testamento poético da ordense Marisol Gándara Sánchez. Ao entender dos membros do Xurado, o libro destaca polo uso coidado da linguaxe, mantendo unha estrutura de “cartas poéticas” nunha voz persoal e directa mantendo un ton reflexivo de carácter existencial e solidario.
Deste xeito, o nome de Marisol Gándara súmase a unha listaxe de nomes que fan parte dunha nova xeración poética que irrompe con pulo no panorama literario do país. Este premio, convocado polo CMI Unidade de Fene coa colaboración do Concello de Fene, premia un libro individual dun autor ou autora inédita procurando, deste xeito, abrir espazo para persoas que inician a súa andaina nas letras galegas. Autores como Mario Regueira, Xiana Arias, Valentina Carro, Susana Sánchez Aríns, Ramón Neto, María Rosendo ou Lorena Souto son algúns dos nomes que acadaron este premio.
Marisol Gándara Sánchez naceu en Francia en 1981, veu a Galicia con poucos meses e criouse en Ordes, é Licenciada en Filoloxía Inglesa pola Universidade de Santiago de Compostela. Obtivo diversos premios a poemas ou pequenos conxuntos de textos entre os que destaca a XV edición do Premio Francisco Añón, do Concello de Outes, en 2011. Ten publicado ocasionalmente algúns poemas no magazine dixital Achtung. A autora remarca que “o poemario está adicado a poeta Eva Veiga e, nela, a todas as mulleres que tiveron e teñen que medrar contra un modelo no que non acaban de encaixar de todo”.
O acto de entrega do premio terá lugar o próximo 17 de novembro, sábado, ás 20.00 h. na sede do Círculo Mercantil e Industrial-Unidade de Fene. Para celebrar o XXV edición do premio, ademais da entrega do galardón a obra premiada este ano, haberá un recital poético no que participarán case todos os gañadores e gañadoras das últimas edicións do certame. O acto pecharase cunha actuación do Coro da Rá dirixido por Ramón Bermejo.