poesiagalega.org, a base de datos e repositorio dixital sobre a poesía no campo cultural galego nos últimos dous séculos, nacida ao abeiro do Grupo Alea de Análise Poética e do Consello da Cultura Galega, ven de rematar cunha etapa por mor da falla de financiamento.
O pasado 4 de decembro de 2012 rematou o ciclo trianual do proxecto de investigación vinculado a poesigalega.org e agora se abre unha xeira nova na que a produción e actualización de contidos do repositorio dixital diminuirá sensibelmente.
A pesar de que isto non suporá a eliminación do repositorio, a diferenza coa etapa anterior é que non se incrementarán contidos co ritmo que até agora se puido manter. O proxecto poesiagalega.org tivo unha fase inicial de preparación, deseño técnico, probas e primeiros axustes que ocupou uns trece meses. A páxina web publicouse a finais de xaneiro de 2011. Desde entón os contidos implementáronse de forma relevante, alcanzándose ao final do trienio cifras moi importantes, tales como:
Rexistros de textos: 879
Rexistros de imaxes: 383
Rexistros de vídeos: 109
Rexistros de son: 104
Libros/Revistas dixitalizadas: 63
Sector Axenda: 695
Sector Noticias: 186
Núemros publicados da Revista de Poesía: 3
Dossieres: 4
Cumpridos os tres anos de vixencia do proxecto, e non existindo posibilidades por parte de poesiagalega.org de concorrer a novas convocatorias dos Programas Sectoriais de Investigación Aplicada por estaren estas conxeladas como consecuencia da situación económica, resulta inviábel manter a unión do equipo e os niveis de produción alcanzados. Fundamentáronse estes ante todo na posibilidade de contratar durante 18 meses unha persoa con formación filolóxica e en edición dixital. Ademais a dispoñibilidade de recursos permitiu cubrir unha serie de gastos orixinados pola localización, dixitalización e edición dos materiais de diverso tipo que se vincularon ao repositorio dixital e á base de datos correlativa.
Ambas as ferramentas seguirán dispoñíbeis no futuro inmediato neste mesmo lugar. En cambio, deixará de estar operativa a Axenda. Tampouco se prevé a saída de novos números da Revista de Poesía, da que se acaba de publicar a terceira entrega.