O padroado da Fundación do Pedrón de Ouro acordou conceder o Pedrón de Ouro 2012 ao colectivo pedagóxico organizado en Nova Escola Galega e O Pedrón de Honra, ao artista ourensán, membro do grupo Nova Estampa Galega, Henrique Ortiz.
A Fundación do Pedrón de Ouro recoñece a Nova Escola Galega a súa vontade continuada no tempo a prol da realización no día a día dunha educación ao servizo, en particular, da nenez e da mocidade galega; tanto, desde as aulas de educación infantil, como mesmo desde aulas universitarias, e tamén dende os diversos espazos de formación de sur ao norte e de oeste a leste, nas diversas direccións da nosa xeografía.
Nova Escola Galega vén promovendo unha educación alicerzada nas ideas da xustiza, da liberdade e da solidariedade, para formaren cidadáns e cidadás conscientes do País que habitan; conscientes de que compre aloumiñar o herdo da lingua e da cultura galega.
Nova Escola Galega veñen procurando desde hai máis de tres décadas xerar de seguido renovadas prácticas e innovacións pedagóxicas. Son moitos os recursos e materiais didácticos que levan construíndo, os encontros de traballo e de formación para o profesorado, intervencións públicas en diversos foros e instancias, sempre da man da laboriosidade e da cooperación. Xunto á Revista Galega de Educación aí están tamén as variadas publicacións feitas polos seus asociados e asociadas en diversos soportes.
O acto de entrega do Pedrón de Ouro e Pedrón de Honra terá lugar o próximo 20 de maio nun acto literario que se celebrará na Casa Museo de Rosalía, en Padrón, ás 12.30 h., no que actuará de mantedora a escritora Fina Casalderrey.
O Pedrón de Ouro entregouse por vez primeira no ano 1964 e recíbeo unha personalidade ou entidade viva e residente en Galicia que destacou na defensa e promoción das diversas facetas da cultura nacional ao longo do ano ou nunha traxectoria vital. Pola súa banda, o Pedrón de Honra dáselle a residentes foráneos que destacasen coas súas achegas ao engrandecemento da nación e da cultura.
Faustino Rey Romero, Ricardo Carvalho Calero, Valentín Paz-Andrade, Isaac Díaz Pardo, Paco Fernández del Riego, Ánxel Fole, Álvaro Cunqueiro, Xosé María Álvarez Blázquez, Xosé Luís Méndez Ferrín, Manuel María, Galaxia ou Xusto Beramendi foron algúns dos gañadores deste Premio.