A Biblioteca Nodal 'Ánxel Casal' de Santiago de Compostela acolle a unha mostra interactiva sobre Celso Emilio Ferreiro que percorrerá Galicia ao longo dos vindeiros meses, primeiro nas bibliotecas nodais, ata o verán, e, a partir de outubro, nos centros de educación secundaria de diferentes localidades.
A instalación multimedia inicia a súa itinerancia en Compostela, onde foi inaugurada esta mañá polo conselleiro de Cultura e Educación, Xesús Vázquez Abad; polos secretarios xerais de Cultura e de Política Lingüística, Anxo Lorenzo e Valentín García, respectivamente; o presidente da Fundación Celso Emilio Ferreiro e fillo do escritor, Luís Ferreiro, que estiveron acompañados pola directora do centro bibliotecario, Carina Fernández.
A proposta desta instalación multimedia para difundir a obra e a vida do poeta e político procura unha aproximación interactiva e multimedia. Consta dunha pantalla interactiva de gran tamaño, que conforma o elemento central da instalación, con acceso a aplicacións multimedia. Un muro vertical móbil co retrato do escritor e unha mesa de luz, con obxectos persoais de Celso Emilio Ferreiro, como as súas lentes, a máquina de escribir e unha cámara de fotos, completan a instalación.
A itinerancia da exposición comeza na Biblioteca nodal de Santiago de Compostela, a Biblioteca Ánxel Casal, onde permanecerá ata o vindeiro 13 de abril. A continuación percorrerá as bibliotecas nodais de Pontevedra, da Coruña, de Ourense e de Lugo, para finalizar esta primeira etapa na Biblioteca Central Vigo.
A partir do mes de outubro este punto interactivo permitiralles afondar no coñecemento sobre Celso Emilio Ferreiro aos estudantes de secundaria doutras nove localidades de Galicia. O centro CIFP Rodolfo Ucha Piñeiro, de Ferrol, o IES Francisco Daviña Rey, de Monforte, o IES de Foz, o IES Maruxa Mallo, de Ordes, o IES Illa de Tambo, de Marín, o IES Aquis Celenis de Caldas de Reis, o IES Xesús Taboada Chivite, de Verín, o IES Lauro Olmo, do Barco de Valdeorras, e o IES de Celanova, vila natal do autor (na que se clausurará esta exposición no mes de decembro), serán os que acollan esta mostra interactiva ao longo de 2012.
