A Plataforma "Comarca de Mondoñedo Unida" xunto coas asociacións Abrindo Camiño e Amigos da Cidade de Mondoñedo, e contando coa colaboración do concello de Mondoñedo, organiza o programa das Rutas Turístico Literarias de Mondoñedo.
Este programa turístico-literario principiará o vindeiro venres 28 de agosto no Centro Comarcal da Mariña Central ás 20.30 h. coa presentación do libro-roteiro de Xosé Ruíz Leivas titulado Un paseo polo Barrio dos Muíños. De seguido haberá unha análise do Roteiro Leiras Pulpeiro, xunto coa proxección do audiovisual Polos Camiños de Leiras dirixido por Matías Nicieza e narrado por Marina Mayoral.
Participan nesta xornada Elena Candia, Xosé Ruiz Leivas, Armando Requeixo, Antonio Reigosa e Luis Fernández Ansedes.
Ao día seguinte, ás 11.00 h. Xosé Ruíz Leivas será o encargado de guiar a todos os asistentes por un roteiro polo Barrio dos Muíños. A saída terá lugar na Oficina de Turismo de Mondoñedo.
O programa das Rutas Turístico Literarias de Mondoñedo continuarán na fin de semana seguinte. O sábado 5 de setembro desenvolverase un roteiro turístico literario sobre Manuel Leiras Pulpeiro. A saída será ás 11.00 h. dende a Oficina de Turismo de Mondoñedo e chegarase ata a Area Recreativa de “A Fervenza” de Viloalle, onde se contará coa participación dos membros do Grupo Literario “Leiras Pulpeiro”: Julia Labrador, Ramón Reimunde, Bernardo Penabade, Matías Nicieza, Francisco Piñeiro, Luis Fernández Ansedes, Jesús Chao, e Xullo Rodriguez Leiras. Xa pola tarde haberá un xantar campestre e un torneo de chave por parellas.
Para asistir aos roteiros é necesario inscribirse ou ben na propia Oficina de Turismo de Mondoñedo ou ben a través do teléfono 639 07 27 69.