A concelleira de Cultura, Pilar López, e Antonio Fernández Maira, representante da Federación de Libreiros de Galicia, presentaron a XV Feira do Libro de Monforte de Lemos que se desenvolverá do 22 ó 25 de agosto na zona peonil da rúa do Cardeal.
Pilar López sinalou que “contamos un ano máis con esta actividade grazas ó esforzo do Concello, á boa vontade da Federación de Libreiros, e á colaboración fundamental da Vicepresidencia Primeira da Deputación de Lugo”. A delegada da área de cultura lembrou que Monforte, xunto con outras localidades, foi excluída da listaxe de feiras que patrocina a Xunta de Galicia, motivo polo que “nos vimos na obriga de procurar esa axuda noutras institucións. Afortunadamente, atopamos o apoio da Deputación de Lugo” dixo.
Antonio Fernández falou do recorte da subvención coa que a Xunta de Galicia apoia as feiras do libro, destacando o esforzo realizado polo Concello para manter esta cita a pesares de non contar coa axuda do goberno galego. O representante da Federación de Libreiros dixo que haberá “actividades para os máis pequenos tódolos días, con maxia, obradoiros e monicreques, unha mesa redonda sobre “os segredos da novela histórica” e a presentación de libros por parte dos seus autores”. Entre eses autores están, entre outros, Fran Zabaleta, Ledicia Costas, Marcos Calveiro ou Pere Tobaruela.
Durante a Feira haberá un 10% de desconto no prezo dos libros, sendo os horarios das casetas dos libreiros de 11.00 h. a 14.00 h. e de 18.00 a 22.00 h. A Feira abrirá o día 22 ás seis da tarde e a inauguración oficial terá lugar ás sete e media do serán.