O xurado dos Premios Luís Tilve, organizados pola Fundación do mesmo nome e encamiñados a estimular a investigación e a recuperación da Memoria Histórica, así como da historia do movemento obreiro e os seus persoeiros veñen de outorgar os seus premios anuais nas catro categorías que o conforman. Dito xurado, presidido por Fernando González Laxe, e integrado por nx0woé Antonio Gómez, Salvador Fernández Moreda, Álvaro Ansias, Carmen Avendaño, Rosalía Mera, Tareixa Navaza, Mª Xosé Rodríguez Galdo e Roxelio Pérez Poza, entregaron ao escritor Manuel Rivas o premio correspondente á categoría "Acción Solidaria".
O escritor coruñés, a ollos do xuri, mereceu este galardón polo seu visible compromiso e sensibilidade coas máis diversas causas sociais, tales como: a recuperación da memoria histórica, observable en moitos dos seus escritos; a defensa do medio ambiente, como se viu durante a traxedia do Prestige; a protección e difusión da lingua galega; ou a defensa dos máis necesitados, como así o demostra o feito de ter cedido os dereitos da obra Milu (Kalandraka) para a Asociación Meniños.
Os outros gañadores foron: Premio "Traballo Digno" á Asociación Pro Saúde Mental A CREBA, Premio "Defensa do Medio Ambiente e dos Bens Comúns" á Estación de Bioloxía Mariña da Graña (EBMG) e o Premio "Investigación e Divulgación Histórica" aos historiadores Ana Romero Masiá e Carlos Pereira Martínez.
O galardóns, consistentes nunha escultura exclusiva do artista César Lombera, serán entregados mañá ás 12.00 h. no Salón de Actos da Fundación Caixa Galicia de Ferrol, situada na Praza da Constitución.