A pesar de quedar fora da xira galega de feiras do libro Lalín celebrará, dende mañá ata o luns 23 de abril, a súa V Feira do Libro, que contará coa presenza de autores como Anxo Fariña, Miguel Vila Pernas ou do creador dos Bolechas Pepe Carreiro, entre outros.
O pregón correrá a cargo do Secretario Xeral de Cultura Anxo Lorenzo, ás 17,00 h. de mañá venres. De seguido Títere Hop, dirixida a adolescentes de entre 13 e 17 anos. Ás 19.30 h. Gemma Lienas, autora da colección 'Os diarios de Carlota', charlará cos adolescentes sobre Gústasme/Gústoche (afectividade e sexualidade).
Ao día seguinte tocarán as presentación das novidades de nx0woep Sandoval, e Fernando Savater. Pola súa banda, o chantadino Anxo Moure chega a Lalín coa súa ciclobiblioteca para animar aos cativos da vila. Rematará a xornada coa entrega dos premios Irmandiños.
Para o domingo o xornalista Miguel Vila Pernas, autor de A cociña de Merlín (Xerais), ofrecerá unha charla sobre a gastronomía na literatura de Álvaro Cunqueiro. Para ás 17.30 h. o ilustrador e escritor Anxo Fariña animará aos máis cativos cos seus debuxos de Antón e Pompón. Unha hora máis tarde avós, pais e nenos teñen unha cita cos xogos tradicionais, para dará paso a un encontro cos larpeiros Benigno Campos e Tomás Alonso.
O luns 23 de abril a xornada empezará con Pepe Carreiro, autor dos libros dos Bolechas. Ás 12.30 h. a pedagoga Ruth Gómez terá unha charla informativa sobre como explicarlles aos máis pequenos a morte con naturalidade. De tarde os autores locais participarán nunha mesa redonda para tratar a situación da literatura na comarca do Deza. A entrega dos premios de marcapáxinas, o espectáculo Viravolta e a lectura de poemas de Rosalía de Castro porán o peche a esta Feira do Libro de Lalín.