O xornalista e narrador vilardexense Juan Tallón obtivo XIX Premio Lueiro Rey de Novela Curta, que convoca e organiza o Concello do Grove coa colaboración da Editorial Sotelo Blanco. A novela de Juan Tallón, Fin de poema, foi galardoada por unanimidade dos membros do xurado presidido por Manuel Quintáns e formado por Ánxela Gracián, Armando Requeixo, Mario Regueira e Francisco Martínez Bouzas. Como Secretaria do xurado con voz mais sen voto, actuou a encargarda da Casa da Cultura do Grove, Marina Aguín. A novela foi elixida entre un total de vinte e cinco orixinais que se presentaron ao certame, baténdose así o récord de participación. Tallón xa quedara finalista na convocatoria deste Certame no ano 2010 coa novela A pregunta perfecta (O caso Aira-Bolaño).
Un dos membros do xurado, o crítico literario Armando Requeixo, publica no seu blog Criticalia unha extensa valoración da obra gañadora, á qie define como "Retrato denso e complexo de personalidades narrado con estilística precisa e depurada" e que se trata dunha novela que "ha dar seguro moito que ler e que falar nos vindeiros meses, pois contribuirá a modernizar a nosa narrativa cunha aposta creativa".
Pola súa banda, outro dos integrantes do xurado, o tamén crítico Martínez Bouzas, subliña no blog Novenoites que "Fin de poema súmase ás tendencias da narrativa contemporánea de converter a literatos, e en xeral a artistas e intelectuais, en personaxes de ficcion". Resume que a novela vencedora ten "unha ollada moi perspicaz, sempre ficcional, sobre fragmentos da vida de catro grandes poetas do século XX: Cesare Pavese, Alejandra Pizarnik, Gabriel Ferrater e Anne Sexton, no seu camiñar cara á destrución persoal e ao suicidio. A trama recrea anacos da vida persoal literaria, editorial dos mesmos, as angueiras, medos, os seus infernos (cancro, alcohol, psicose e paranoias), as súas experiencias vitais, as súas torturas, as súas tendencias suicidas, o seu camiño pola cerna da angustia ata chegar finalmente ao suicidio".
Fin de poema estará nas librarías do país a comezos do vindeiro ano.