Baixo o lema “Galicia como tarefa”, recollido dun título de Valentín Paz Andrade, xuntáronse no Hotel Os Escudos de Vigo máis de trescentas persoas representativas dos diversos ámbitos da política, da sociedade e da actividade cultural do país para coñecer o ditame da trixésimo quinta edición dos Premios da Crítica Galicia na súas modalidades de Creación Literaria, Investigación, Música, Iniciativas Culturais, Artes Plásticas e Visuais e Artes Escénicas e Audiovisuais.
Nun acto conducido por Comba Campoy o presidente da Fundación Premios da Crítica Galicia Bieito Ledo realizou un chamamento á valentía e sabedoría dos galegos para facerlle fronte á realidade actual. No mesmo acto presentouse o libro conmemorativo 35 anos de cultura, editado pola propia Fundación.
O xurado da modalidade de Creación Literaria, formado por Ana Romaní, Luciano Rodríguez Gómez; Olivia Rodríguez, Fina Casalderrey; Isabel Mociño, Xavier Lama e Blanca Roig, que actuou como secretaria, acordou outorgar por unanimidade o premio a Fantasmas de luz de Agustín Fernández Paz, publicado por edicións Xerais. O xurado apuntou como razóns para premiar esta obra “a súa capacidade de enfiar cine e literatura na arquitectura da novela, unha das marcas poéticas do autor; o tratar problemas da sociedade de hoxe que levan á invisibilidade dos excluídos, aínda que a historia se sitúe nunha etapa anterior á crise; o facelo con humor, fina ironía e unha ollada atenta aos problemas profundos da nosa sociedade; e, por último, pola súa mensaxe final que, malia as denuncias, está cargada de optimismo e esperanza nun futuro mellor.
O resto dos premiados foron: Patricia Fra López en Investigación, a Asociación Galega de Compositores” co Premio de Música, O sorriso de Daniel” obtívoo na categoría de Iniciativas Culturais, Carmen Nogueira o Premio de Artes Plásticas e Visuais, e en Xosé Manuel Olveira “Pico” recaeu o Premio de Artes Escénicas e Audiovisuais.