A editorial pontevedresa Kalandraka, a través do seu selo Faktoría K de Libros, recupera a mítica colección de poesía Tambo, que interrompera a súa actividade en 2006 despois de máis de trinta entregas baixo o carimbo da Deputación de Pontevedra. Nesa colección apareceran títulos emblemáticos de autores como Román Raña, Carlos Oroza, Xavier Seoane, Ramiro Fonte, Antón Patiño, César Antonio Molina, etc.
Faktoría K inicia esta nova andaina da colección Tambo cos títulos Os ángulos da brasa, de Manuel Álvarez Torneiro, e a antoloxía de poetas vascos Alén da fronteira. A colección Tambo, que coordina como o facía daquela o escritor e xornalista Luís Rei Núñez, abrirase a autores doutras linguas traducidos directamente para o galego. A próximo título será Tríptico, do catalán Antoni Marí.
O poemario de Manuel Álvarez Torneiro (A Coruña, 1932) -cunha ilustración de Fausto Isorna na portada- supón o seu reencontro cos lectores despois de Parábola do incrédulo (Deputación de Pontevedra). Nestas 67 composicións, o autor reflexiona sobre a cotidianeidade, as emocións íntimas e a dimensión simbólica da palabra.
Pola súa banda, Alén da fronteira reúne textos de Luigi Anselmi, Bernardo Atxaga, Jon Gerediaga, Tere Irastortza, Xabier Lete, Xabier Montoia e nx0woeba Sarrionandia. Cada un presenta media ducia de poemas —en edición bilingüe éuscaro-galego traducidos por Isaac Xubín— que pretenden estimular o interese dos lectores por unha poesía insuficientemente divulgada máis aló de Euskadi. Cunha imaxe de Ángel Cerviño na capa, este volume está prologado por nx0woé Ángel Irigaray.