Tal día coma hoxe hai dez anos deixábamos Carlos Casares, unha das figuras máis senlleiras no impagable labor de difusión e promoción da cultura galega e un dos nosos mellores escritores de último terzo do século pasado.
Aínda que Casares naceu en Ourense un 24 de agosto de 1941, os seus primeiros anos van transcorrer en Xinzo de Limia, onde o seu pai, Francisco Casares, traballaba de mestre. Carlos estudará no Seminario de Ourense, onde toma o seu primeiro contacto coa literatura e cos problemas que padece a lingua propia do país. Vai ser en Ourense onde coñece a un Risco envellecido e a outros intelectuais e artistas da época, como Antón Tovar, Acisclo Manzano, Ferro Couselo, Xaime Quessada, etc.
En 1961 Carlos Casares marcha a Compostela e matricúlase en Filosofía e Letras, especializándose en Filoloxía Románica. En Compostela coñece a Ramón Piñeiro. Desa época compostelá son os seus primeiros libros, como Vento ferido, Cambio en tres ou o relato A galiña azul, un conto para nenos que reflicte moi ben o espírito comprometido e libertario dunha época negadora de convencións e uniformismos.
No ano 1977 Casares entra a formar parte da Real Academia Galega, sendo daquela o membro máis novo en entrar na institución. No ano 1982, Casares sae elixido deputado ao Parlamento de Galicia pola circunscrición electoral de Ourense. Presentouse ás eleccións como "galeguista independente" nas listas do PSdeG-PSOE e nesa andaina estivo acompañado por Ramón Piñeiro, Alfredo Conde e Benxamín Casal. En 1986, baixo a proposta de Piñeiro, pasará a dirixir a editorial Galaxia, posto que desenvolvería ata a súa morte, ao igual que a presidencia do Consello da Cultura Galega, onde entrou en 1996.
Carlos Casares finaría un 9 de marzo de 2002 en Vigo, deixando un pouco orfa a cultura galega. Casares foi unha unha figura clave no proceso de normalización da nosa lingua, de recuperación da dignidade da nosa cultura e da súa difusión internacional.
Homenaxe da editorial Galaxia
Baixo o título Dez anos con Carlos Casares a Editorial Galaxia bota a andar, este venres 9 de marzo, un mollo de actividades entre os que destacan a edición en dixital da súa obra. Actívase tamén un blog no que escritores, estudosos, críticos e lectores deitarán, a través de distintos artigos, semblanzas e recomendacións, a súa visión sobre a vida e a obra do autor de Ilustrísima.
Ata fin de ano e cada dúas semanas, irán aparecendo no Blog de Carlos Casares, ao que se accederá dende un enlace específico na web da editorial (www.editorialgalaxia.com), artigos de diversa profundidade. Así, na primeira entrega, o escritor Antón Riveiro Coello, escribe unha semblanza dun autor ao que define "como un pai, un mestre".
Para este ano Galaxia acomete tamén a dixitalización das súas obras. Todos os internautas interesados poderán acceder á adquisición destes libros agora preparados para a súa lectura dixital.
Por outra banda, e coa idea de presentalo na Feira do Libro da Coruña, que se celebra en agosto, mes no que naceu Casares, Galaxia publicará un libro de homenaxe, obra de Rafael Laso que, cun abondoso material fotográfico fará un achegamento completo á súa biografía. Ao tempo, a publicación contén un mollo de entrevistas con amigos que o coñeceron ben e distintos escritores que se viron influídos polo seu traballo.
Finalmente, e coincidindo co final deste Ano Casares, Galaxia publicará un número especial da Revista Grial dedicado integramente á súa vida, obra, e pegada literaria.