O pasado 23 de decembro finaba o escritor, intelectual e político Gonzalo Bouza Brey na súa Vilagarcía de Arousa natal.
Bouza Brey cursou estudos de Dereito e Historia na Universidade de Santiago de Compostela. Tras os estudos exerce como procurador dos tribunais en Vilagarcía no despacho xurídico do seu pai Luis Bouza-Brey, actividade que compaxinará coa súa militancia no Partido Comunista de Galicia, aínda na clandestinidade. Acadadas as liberdades democráticas, continúa a súa militancia proposto como candidato a deputado e elixido Tenente Alcalde na primeira corporación municipal democrática vilagarciá, formando parte do goberno do Concello integrado por unha coalición PSOE-PCG.
Tamén participa activamente no movemento cultural na comarca, sendo socio fundador e secretario das seguintes entidades: Asociación Cultural de Arousa, Ateneo de Arousa, Padroado da Banda Municipal de Música de Vilagarcía, Asociación de Amigos do Ferrocarril “Arousa Tren”, así como asesor de outras numerosas entidades.
Bouza Brey foi presidente do Primeiro Congreso de Poesía Galega celebrado en Vilagarcía en 1997 co gallo do cincuentenario da edición nesta cidade do poemario Cómaros Verdes de Aquilino Iglesia Alvariño, o primeiro libro publicado en galego trala Guerra Civil, e dirixiu entre outros os cursos do Concello de Catoira e a Universidade de Santiago sobre A resistencia cultural de Galicia no franquismo e a Loita guerrilleira en Galicia contra a ditadura.
Ten publicados individualmente os poemarios Canto en tres tempos de amor e esperanza e Periplo de amor e mar. Con carácter históico e de investigación publicou: Ferro Couselo e o Ateneo do Ullán, Luis Bouza-Brey, obra completa ou O alcumario de Arousa, do Ullán e do Salnés, entre outras obras.
Tamén exerceu unha faceta xornalística en El Correo Gallego, El Pueblo Gallego, Hoja del Lunes de Vigo, La Voz de Galicia, Faro de Vigo e Diario de Arousa, ocupando neste último o cargo de fundador e coordinador do seu suplemento cultural “Arousa un mar de cultura” durante máis de sete anos.
Non chegou a ser editada a obra A literatura galega en Portugal, 1900-1980, na que se recollen 1965 publicacións galegas no país veciño tanto en libros, como relatorios e comunicacións en congresos ou en revistas e xornais durante ese período de tempo. Tamén permanecen inéditos os libros Os meus mestres, onde recolle a súa relación e vivencias con persoeiros como Otero Pedrayo, Fermín Bouza-Brey, Risco, Xocas, Álvarez Blázquez, Santos Junior, Borobó, Ramón Velenzuela, Paz Andrade, Francisco Xosé Veloso, Dieste, Seoane…e A cociña tradicional das casas señoriais galegas dos séculos XIX e XX, compendio de 243 receitas procedentes dos receitarios das súas devanceiras.
