A Asociación Monte Pindo Parque Natural está a traballar nunha ambiciosa iniciativa para reunir nun só volume a obra poética máis destacada sobre o Olimpo Celta creada durante séculos por ducias de diferentes estudosos, literatos e creadores de todos os tempos, xunto con novas poesías inéditas dos máis prestixiosos escritores do escenario literario galego. Todo este inmenso potencial creativo formará parte da Antoloxía poética do Monte Pindo que está a piques de nacer.
Os organizadores desta iniciativa puxéronse en contacto cunha editorial galega que se comprometeu a asumir a edición de dita obra, sempre e cando dende a Asociación lles garantan a adquisición anticipada dun mínimo de exemplares. Por iso a Asocación Monte Pindo Parque Natural abriron unha conta na plataforma social de crowfunding Goteo.org
Este proxecto está impulsado e coordinado polos escritores Francisco X. Fernández Naval e Miro Villar, ambos afincados na Costa da Morte e membros da Asociación Monte Pindo Parque Natural. O obxectivo do proxecto é enriquecer e estimular a produción literaria arredor do monte sacro dos nosos antergos, mais tamén xuntar os esforzos de conservación da imaxinación e da historia en torno aos recursos naturais do Monte Pindo e fortalecer as actividades abertas, de lecer e de conciencia, que son realizadas regularmente neste espazo.
As e os que queiran converterse en subscritor popular, poden facelo dende a páxina do proxecto en Goteo.org e facer reserva dun ou varios exemplares da Antoloxía Poética do Monte Pindo a un prezo único de 10 euros (o que supón un aforro de ata 5 euros sobre o prezo final que terá a obra nas librarías). O ingreso pódese facer usando a tarxeta de crédito ou ben mediante PayPal.
Os organizadores desta iniciativa precisan un número mínimo de 105 subscricións antes do 19 de novembro. Quen queira recibir algunha información adicional poden facelo a través do correo Este enderezo de correo está a ser protexido dos robots de correo lixo. Precisa activar o JavaScript para velo. ou chamando ao teléfono 655 56 43 72.