Onte o intelectual e dinamizador da cultura galega Francisco Fernández del Riego cumpriría cen anos. Dende a Fundación Penzol e a editorial Galaxia queren conmemorar o Centenario Francisco Fernández del Riego coa creación dun blog no que se recollerán as novas, colaboracións e textos de ou sobre Fernández del Riego que a conmemoración vaia xerando. O blog está dispoñible nesta ligazón.
Para celebrar este centenario, Galaxia ven de publicar o libro Francisco Fernández del Riego. Vigo dende o corazón de Galicia, que se presentará o vindeiro xoves 10 de xaneiro na Casa da Cultura de Vigo ás 19.00 h. O acto contará coas intervencións de Alfonso Zulueta de Haz, Presidente da Fundación Penzol, Xosé Luis Franco Grande, María Dolores Cabrera, Malores Villanueva e o alcalde de Vigo, Abel Caballero.
Francisco Fernández del Riego, que nos deixou a finais de 2010, é unha das figuras senlleiras da cultura galega do último século. Naceu no ano 1913 en Lourenzá e, tras unha parada en Monforte de Lemos, principia en Madrid a carreira de Dereito, que rematará en Santiago de Compostela. É na capital de Galicia onde tivo del Riego os seus primeiros contactos co Seminario de Estudos Galegos e coa Xeración Nós e mais cos que pronto se converterían en membros fundadores do Partido Galeguista. Estoupa a Guerra Civil e traballa clandestinamente na posguerra para a reorganización do Partido e da recuperación da identidade cultural de Galicia.
Nese labor de recuperación e de mirar cara adiante, as actividades que desenvolveu Francisco Fernández del Riego son case que innumerábeis. Foi un dos principais artífices da editorial Galaxia e director xunto a Ramón Piñeiro da revista Grial nos seus primeiros cen números. Ingresou en 1960 na Real Academia Galega, entidade que chegou a presidir no ano 1997. En 1950 funda a Fundación Penzol, onde traballaría a diario ata pouco antes de morrer.
Despois de tantos anos de traballo, Fernández del Riego fora recoñecido con numerosos galardóns: Premio Trasalba, Premio Pedrón de Ouro, Medalla de Ouro da Cidade de Vigo, Premio de Creación Cultural da Xunta de Galicia, Premio Celanova, Casa dos Poetas... Así mesmo, foi nomeado Doutor Honoris Causa pola Universidade de Vigo e Galego Egrexio pola Fundación dos Premios da Crítica.
Foi autor dunha extensísima obra entre a que sobrancean textos como Historia da literatura galega (1951), Galicia no espello (1954), Diccionario de escritores en lingua galega (1990) ou A xeración Galaxia (1996). No eido narrativo brillou con luz propia no ano 1992 con O cego de Purmadeón. Deixou escrito, tamén, centos de artigos xornalísticos.