Onte comezou a 41ª edición da Feira do Libro da Coruña, que se desenvolverá ata o 10 de agosto nos xardíns de Méndez Núñez.
A Feira da cidade herculina consolídase un ano máis como a feira do libro de referencia de Galicia, tanto polo éxito de público como de casetas, que este ano amplíase ata as 41 participantes. Na edición deste ano contarase coa presentación de 34 novidades editoriais e coa participación de 100 autores e máis de 60 sinaturas de libros. Haberá obradoiros, exposicións e actividades que, todas as mañás, estarán dirixidas aos máis pequenos da casa.
A 41ª edición da Feira do Libro contará coa participación de 27 librarías, 16 da Agrupación de Libreiros da Coruña, ademais de 13 editoriais de todo o país. Autores como Manuel Rivas, Xoán Abeleira, Xabier P. Do Campo, Antón Baamonde, Víctor F. Freixanes, Ledicia Costas, Agustín Fernández Paz, Xosé Ramón Barreiro Fernández, Xosé Neira Vilas ou Manuel Lourenzo González entre outros moitos asinarán e presentarán as súas obras máis recentes.
A Feira do Libro da Coruña abrirá as súas portas de 11.00 h. a 14.00 h. e de 18.00 h. a 22.00 h. e, como cada ano, realizaranse sorteos diarios e os libros contarán cun desconto do 10%.