O venres 26 de outubro a Fundación Luís Tilve,fará entrega dos galardóns anuais que levan o seu nome, na que xa é a sétima edición. O acto de entrega terá lugar no Auditorio Municipal de Vigo a partir das 19.30 h., e contará coa presenza de diversas personalidades da vida pública, social, cultural, sindical e política, tanto da cidade de Vigo como de Galicia en xeral. Entre eles estarán os membros do Xurado, composto por: Fernando González Laxe, nx0woé Antonio Gómez Gómez, Salvador Fernández Moreda, Álvaro Ansias Bacelar, Carmen Avendaño Otero, Ana Romero Masiá, Tareixa Navaza González, Mª Xosé Rodriguez Galdo e Roxelio Pérez Poza.
O premio Investigación e Divulgación Histórica recalou na historiadora Aurora Marco López, polo seu traballo de investigación sobre As mulleres na guerrilla antifranquista galega, publicado pola editorial Laiovento. Este libro recolle a traxectoria destas mulleres, do monte e da chaira, que colaboraron coa Federación de Guerrillas León-Galicia nas décadas dos 50 e 60, recuperando os seus nomes para facelas visibles a nosa historia. Este traballo deu lugar tamén a un documental titulado “Silenciadas”, realizado por Pablo Ces.
O resto dos premiados foron Xavier Fortes López, na categoría de premio Traballo Digno; o Proxecto Bubisher, na categoría de premio Acción Solidaria;e ao Museo do pobo Galego, no apartado premio Defensa do Medio Ambiente e dos Bens Comúns.
Os premios consistirán nunha escultura exclusiva do artista César Lombera, na que aparecen unhas mans entrelazadas, as cales representan simbolicamente todas as actitudes que se pretenden recoñecer e o propio espírito dos Premios.