Onte anunciáronse os nomes das gañadoras dos premios Xerais, unha das citas senlleiras do panorama literario en Galicia, nas súas tres modalidades: novela de adultos, novela xuvenil e novela infantil.
Andrea Maceiras, coa novela A folla azul, foi a gañadora do XXXV Premio Merlín de Literatura Infantil; Antonio M. Fraga, con santoamaro, resultuou gañador do XII Premio Jules Verne de Literatura Xuvenil; pola súa banda, María Marco Covelo acadou o XXXVII Premio Xerais de Novela coa obra Coidadora.
Os libros gañadores dos tres premios chegarán ás librarías no mes de abril de 2021.
A folla azul, de Andrea Maceiras.
A folla azul narra en primeira persoa a historia de Husu Aké, unha nena pertencente ao pobo amazónico dos Tacaré.
No corazón da Amazonia, sen contacto coa civilización occidental, a vida da tribo transcorre marcada polo ciclo da natureza e rexida polo espírito de Bekororoti. Ata que un día, a sabia avoa Arumi ten un soño premonitorio e presente que se aveciña un desastre. Sabe que é o momento de contarlle á súa neta Husu Aké, «a nena dos ollos de luz», o segredo que leva gardando durante anos e preparala para salvar o seu pobo da ameaza, a enfermidade e a morte.
Husu Aké emprende entón unha viaxe heroica na procura dunha folla azul, o único remedio capaz de salvar os seus segundo o soño da avoa Arumi.
santoamaro, de Antonio M. Fraga
Un grupo de amigos e amigas que acaban de rematar bacharelato deciden reunirse todos os sábados do verán pola noite na coruñesa praia de Santo Amaro. Queren aproveitar o tempo que lles queda antes do inicio dun novo curso con cambios importantes que poden supoñer a súa separación.
As relacións que se establecen entre eles e elas durante eses dous meses e medio, a evolución da súa personalidade, as preocupacións que lles xorden por distintos motivos vitais e a resolución deses conflitos propios da idade adolescente conforman a trama da novela, presentada como unha función teatral cuxo escenario é a propia praia.
Coidadora, de María Marco Covelo.
A novela gañadora do Premio Xerais de Novela aborda un tema de actualidade como é o das coidadoras e faino desde a perspectiva de alguén que coñece ben esa profesión de maneira que é quen de meternos na pel das persoas que o desempeñan, facéndonos partícipe da angustia que, en ocasións, provoca este traballo.
Ademais, o xurado salienta a inclusión na novela de focos temáticos vinculados coa ciencia, o lirismo que agroma que en moitas das súas páxinas e a existencia de distintos niveis de lectura da mesma, sen esquecer o feito de que a proposta configura unha lectora, un lector, activo e interveniente e, en xeral, ofrece un traballo literario pouco convencional e arriscado.
Os xurados desta edición estiveron formados por:
No premio Merlín: Marta Añón Montes, mestra e autora de material educativo; Sonia García Vidal, mestra, ilustradora e videógrafa; Víctor Pérez Estévez, coordinador do Club de lectura Lendo Contigo de Espazo Lectura; María José Pousa, Asesora técnica docente de bibliotecas escolares; Mario Regueira, escritor e crítico literario; e Anaír Rodríguez, secretaria do xurado, en representación de Xerais, con voz e sen voto.
No Premio Jules Verne: Pablo G. Freire, redactor na revista online de literatura xuvenil El Templo de las Mil Puertas; Selina Otero, xornalista en Faro de Vigo; Cristina Álvarez Pérez, profesora de Educación Secundaria e coordinadora do Comando Le de Espazo Lectura; María Xesús Nogueira, profesora na USC e crítica literaria; Brais Nogueira, xornalista; e Xosé Manuel Moo Pedrosa, secretario do xurado, en representación de Xerais, con voz e sen voto.
No premio Xerais de novela: Noa Moreira, poeta; Carlos Coira, libreiro; Alberto Cifuentes, profesor; Sara Vila Alonso, xornalista; Iria Pedreira Sanjurjo, filóloga e tradutora; e Ramón Nicolás, secretario do xurado, en representación de Xerais, con voz e sen voto.
