Onte principiou en Santiago de Compostela Alguén que Respira!, primeira edición do Festival de Poesía para Corpo Principal que organiza o Concello compostelán coa colaboración da Secretaría Xeral de Política Lingüística do goberno do país.
Baixo a dirección artística de Antón Lopo, serán catro as xornadas dun intenso programa que reúne a algunhas das voces máis singulares e importantes da poesía galega e internacional, desde María Xosé Queizán a Olvido García Valdés, pasando por Andrew McMillan, Raquel Lima, Estíbaliz Espinosa, Olga Novo ou Niño de Elche, creador revolucionario do cante flamenco que traerá a Compostela o seu impactante espectáculo poético, exhibido só de forma esporádica.
A poeta viguesa María Xosé Queizán foi a encargada de ler na xornada de onte o manifesto do Día Mundial da Poesía. Pola tarde tivo lugar o primeiro dos recitais coa intervención de Andrew McMillan, Olga Novo, Olvido García Valdés, Salvador García Bodaño, María Sevilla e María Xosé Queizán.
As actividades continuarán hoxe ás 17.00 h. cun café-diálogo no que participarán Andrew McMillan e Olvido García Valdés, acompañados por Isaac Xubín e Ana Romaní. A partir das 19.00 h. terá lugar o recital "Catro graos de abertura", título que fai referencia aos catro graos de abertura das vocais en galego e que, nun programa dobre, inclúe dous enfrontamentos de regueifa, e un torneo de slam, coa participación dos mellores slamers que actualmente traballan en Galicia e Portugal: Duke Sam, Nuria Vil, Oriana Méndez, Carlos da Aira, Esther Carrodeguas, Raquel Lima e Vítor Hugo Moreira. O torneo, con acompañamento musical de Velpister, estará presentado por Silvia Penas. Para pechar a xornada, a partir das 22.00 h., o recital "Poesía no fío" ofreceralle aos espectadores a proposta nos lindeiros poéticos que formulan, conxuntamente por encargo do festival, Clara Gayo, Carlos Santiago e Zé Paredes.
O venres 23 divídese en tres apartados, que abranguen dende a poesía performática á videopoesía. Ás seis e media da tarde, o festival propón no recital "Atravesei a verxa" un percorrido por insólitos espazos do Teatro Principal a través das voces de Isaac Xubín, Luísa Castro, Xabier Xil Xardón e Javier Peñafiel.
Os espectadores non só se adentrarán en liñas de recitación personalísimas, senón que tamén descubrirán ámbitos do teatro con acceso restrinxido, como o fallado, as terrazas ou os camerinos. A partir das 20.00 h., dese mesmo 23 de marzo, celebrarase unha sesión centrada na "Escrita en conflito", título que reúne o testemuño directo de Miguel-Anxo Murado sobre a literatura nos espazos de conflito bélico, e o recital do refuxiado sirio Mohamad Frias Alshaheen e o saharauí Bahia Mahmud Awah, presentado por Iván Prado, responsable da organización Pallasos en Rebeldía. A xornada pecharase a partir das 21.30 h. coa proxección de varios videopoemas de Miriam Reyes, Estela Pan, Cintaadhesiva e Celia Parra.
Finalmente, o sábado 24, o festival clausúrase cun recital ás 22.00 h., presentado por Ana Romaní, no que participan Estíbaliz Espinosa, Ana Vallés con Nuria Sotelo e Lupe Gómez, ademais de Niño de Elche.
Con motivo da celebración do Festival, a Concellaría de Acción Cultural e a Secretaría Xeral de Política Lingüística editaron un libro que inclúe o programa completo do ciclo e as achegas poéticas de cada un dos participantes. O volume, deseñado por Manolo Martínez, presenta, xunto a un pequeno perfil biográfico, importantes novidades literarias, xa que nel aparecen os avances dos novos poemas de Olga Novo, as primeiras traducións ao galego de Andrew McMillan –realizadas por Isaac Xubín–, ou de Mohamad Firas, ademais de textos inéditos de Luísa Castro, Xil Xardón, Silvia Penas e Oriana Méndez, ou os primeiros poemas en galego de Miriam Reyes. Inclúese, así mesmo, o Manifesto que o festival lle encargou a María Xosé Queizán. Deste xeito, o propio programa de Alguén que Respira! convértese en por si nunha publicación de indubidable valor literario que acrecenta a transcendencia dun festival sen precedentes en Galicia.
O Festival Alguén que Respira! non só intenta ser un expositor de tendencias ou un lugar de encontro para afeccionados e afeccionadas á poesía, senón que fai tamén unha aposta por incentivar experiencias que, habitualmente, non teñen un especial apoio. Ese é obxectivo de programa de producións, xestionadas dende o festival con distintos creadores para ampliar o horizonte poético e proporcionar porosidades onde conflúan dimensión creativas interdisciplinares. Este ano, as propostas de produción foron para un espectáculo de Ana Vallés sobre a poesía de Lupe Gómez, outro de Clara Gayo, Carlos Santiago e Zé Paredes, e por último un videopoema de Miriam Reyes, o primeiro en galego desta autora nacida en Ourense que, porén, desenvolveu a súa actividade sempre fóra de Galicia.
As entradas a todas as actividades do festival son de balde, previa retirada de invitación no despacho de billetes do Teatro Principal. Os convites poderanse recoller das 18.00 h. ás 21.00 h.