Todo listo para celebrar unha nova Noite Poética A Pipa. Dende que no Nadal de 1996 o poeta Uxío Novoneyra inaugurara estas Noites a Asociación Cultural A Pipa de Becerreá, responsable da organización destas veladas, celebran cun autor ou autora estas noites máxicas que enchen de versos a montaña luguesa. Este ano o autor homenaxeado será Xesús Bermúdez Tellado, que ven de publicar o seu primeiro libro: Viaxe sen cancelas, en Redelibros.
A poesía de Xesús Bermúdez Tellado é de aparencia sinxela, moi pegada ás vivencias que a provocaron. A través dela tamén podemos vernos reflectidos nós e atopar acubillo entre os seus versos. Bermúdez Tellado colaborou durante moitos anos coa revista que publicaba A Pipa ata o ano 1995, amais de participar en Becerreá como actor no teatro afeccionado.
Esta XXI Noite Poética A Pipa terá lugar na Casa da Cultura de Becerreá o xoves 27 de decembro ás 21.00 h.
XXI Certame Literario "A PIPA" 2012 da Alta Montaña Luguesa.
No transcurso da Noite Poética entregaranse os premios correspondentes ao XXI Certame Literario "A PIPA" 2012 da Alta Montaña Luguesa.Os interesados en participar neste Certame poden consultar as bases nesta ligazón.
O prazo para presentar os traballos rematan o 22 de decembro.