Este domingo 27 de maio celébrase unha nova edición da Feira do Libro da Guarda.
Esta feira, que xorde coa idea de dedicar unha xornada completa ó mundo dos libros e fomentar o seu consumo, ven este ano cargada de actividades. Como ven sendo habitual, as librarías participantes porán á venda os libros cun 20% de desconto; pero ademais haberá un posto no que se poderán adquirir as diferentes publicacións que ten editadas o Concello da Guarda e outro no que poder realizar un intercambio de libros.
Este ano incorpóranse algunhas novidades respecto as edicións anteriores, como unha firma de libros por parte do escritor Francisco Castro. Realizarase tamén, o sorteo de cinco lotes de libros nos que se inclúen antoloxías dos autores homenaxeados nas últimas edicións das Letras Galegas.
Repetirán outras actividades de grande éxito en anos anteriores, como os obradoiros, que este ano están pensados para deixar voar a creatividade e a imaxinación de cada quen: Obradoiro de Cómic, “Escribe o teu conto” e “Que che inspira?”; e o habitual espectáculo de tarde “A Caixiña de Música” que porá o broche final a esta apertada axenda pensada para agradar a tódolos públicos.