A Galería de Mulleres da Biblioteca da Muller do Concello de Muxía dedica á escritora galego-cubana Anisia Miranda (Cuba, 1935-Gres, 2009) este mes de outubro.
Coa Galería de Mulleres destácase cada mes o labor dunha muller no mundo das artes, as letras, a ciencia, ... Cada mes estará dedicado a unha muller e repartiranse carteis nos que apareza esa muller e indicacións para informarse sobre ela ou para acceder á súa obra. Con cada muller destacada indicarase que libro ou libros están á disposición do usuario/a na Biblioteca da Muller do Concello de Muxía, escritos por esta muller ou que fagan referencia á mesma. Actualmente, a biblioteca da Muller conta con máis de 440 títulos no seu fondo bibliográfico.
De pais ourensáns, emigrantes en Cuba, naceu Anisia Miranda. Despuntou xa canda nena no mundo das letras. En 1953 marcha a familia para Arxentina, onde contacta co movemento cultural galeguista. En 1954 coñece a quen logo será o seu home, Xosé Neira Vilas.
Anisia fai un labor inmenso como promotora da cultura galega sendo moi activa na reivindicación e difusión da pintura, literatura e cultura galegas. En 1961, logo de triunfar a Revolución Cubana, volve á illa e alí dedícase de cheo á súa profesión xornalística e á literatura. Traballa no Consejo Nacional de Cultura e logo será a coordinadora nacional de edicións para nenos e mozos. Do seu incesante e exitoso labor literario dan conta todas as súas publicacións amplamente reeditadas.
Anisia e Xosé deciden voltar á terra en 1991, concretamente á aldea de Gres (aldea natal de Neira Vilas). Crean a Fundación Neira Vilas da que Anisia é vicepresidenta e dende onde desenvolverá un importantísimo traballo de organización e participación en actividades culturais. Todo o seu labor literario e de dinamización cultural foi merecedor de recoñecemento que se plasmou en diversos premios.
