Agustín Fernández Paz foi designado candidato ao premio Hans Christian Andersen, que outorga o IBBY (International Board on Books for Young People) a un escritor/a e a un ilustrador/a cuxa obra completa significa unha contribución importante á literatura infantil. Está patrocinado pola Raíña Margarida de Dinamarca.
A OEPLI (Organización Española para el libro infantil y juvenil) é a encargada de presentar as candidaturas correspondentes ao Estado español e este ano valorou a ampla e recoñecida traxectoria do escritor Agustín Fernández Paz para propoñelo ao prestixioso premio infantil, considerado o Premio Nobel da LIX. O fallo do Xurado farase público na Feira de Bolonia de 2012 e a entrega de Medallas durante o 33º Congreso de IBBY, que se celebrará en Londres, o mesmo ano.
Agustín Fernández Paz tamén será o candidato presentado pola OEPLI para o premio Iberoamericano de literatura infantil edicións SM. Convócao anualmente o Instituto SM para a Educación xunto coas institucións que conforman a Asociación do Premio.
Por outra banda, Montse Pena Presas, como responsable da Sección de Crítica da Asociación Galega do Libro Infantil e Xuvenil, propuxo 5 obras como candidatas a entrar na Lista de Honra do IBBY, nas categorías de tradución, ilustración e obra literaria. Esas obras, foron sometidas a un proceso de votación entre os integrantes da Xunta Directiva, para elixir as obras finalistas.. Para a Lista de Honra 2012 a OEPLI presentará os siguientes títulos: Chamádeme Simbad (Galaxia) de Francisco Castro, na modalidade de escritores; e Kafka e a boneca viaxeira (Galaxia), traducido por Carmen Torres na modalidade de tradutores.
E tres serán os ilustradores galegos presentados pola OEPLI para a Bienal de Ilustración de Bratislava. Anxo Fariña con No castelo de Mabel (A Nosa Terra), David Pintor con Contos para nenos que durmen deseguida (Kalandraka) e Kristina Sabaite por Ola, ola, la! (Galaxia) competirán por conseguir o Grand Prix que designa ao gañador.