A I Festa da Literatura de Allariz servirá para dar a coñecer tres novos proxectos da vila allaricense: a editorial Aira, a libraría Maruxaira e o espazo Ben Común. Será un día enteiro de presentacións literarias, obradoiros e música.
A xornada terá lugar o martes 26 de decembro e principiará ás 11.30 h. na Galería Circular (R/ Lobariñas, 9) coa presentación de Alter-Nativo (Aira), un libro ilustrado de Jorge Campos, ao que seguirá un obradoiro infantil.
Xa pola tarde terá lugar a presentación da libraría Maruxairas, onde se presentarán os primeiros libros editados pola editorial Aira: Curiosidade, de Estíbaliz Espinosa; e Vidas imaxinarias, de M. Schwob. Contarase coas intervencións de María do Cebreiro e Samuel Solleiro.
E para rematar esta I Festa da Literatura de Allariz Abe Rábade Trío estará ás 20.00 h. ofrecendo o seu espectáculo en Ben Común (Pza. Torre Lombarda, 1). A entrada será de balde mercando calquera dos tres títulos editados por Aira Editorial.