A coruñesa Eli Ríos, coa obra Bicha (presentada baixo o lema Pumuqui), foi a gañadora da XII edición do "Premio Pura e Dora Vázquez de Narración", que convoca a Deputación de Ourense.
O xurado destacou da obra premiada "o atractivo dos seus personaxes para o lector e a importancia que o relato da a amizade entre nenos e animais, ademais de axeitarse perfectamente para ser ilustrada dentro do espírito do premio". De todos os textos presentados ao premio, o xurado destaca a gran calidade literaria e salienta a dificultade que isto supuxo na elección. A gañadora foi seleccionada de entre dúas obras que competiron ata o final, sendo elixida finalmente Bicha por maioría.
Segundo as normas do premio, a obra gañadora será enviada aos interesados en participar no "XII Premio Pura e Dora Vázquez de Ilustración", para o cal a Deputación de Ourense acaba de abrir a súa convocatoria. A esta modalidade de ilustración poderán concorrer os ilustradores que presenten os seus traballos, inéditos e orixinais que se axusten ás bases do premio e que tomen como base o texto premiado de Eli Ríos. Nesta modalidade establécese un premio de 1.500 euros, e os traballos terán que estar presentados antes do 30 de marzo de 2015.
O xurado do "XII Premio Pura e Dora Vázquez de Narración" estivo presidido por Avelino García Ferradal, deputado de Cultura da Deputación de Ourense, e integrado como vogais por José Manuel Fernández López, María Rosa González Méndez, Franci Stella Estrada Mosquera e Xosé Manuel Cid Fernández, actuando como secretaria Ana María Malingre Rodríguez.
Eli Ríos, que recentemente resultou gañadora do Premio Modesto R. Figueiredo por Remexido de patacas, colabora co xornal Sermos Galiza e como crítica literaria na revista dixital A Sega.