Teño nas miñas máns o último libro de Miguel-Anxo Murado, O soño da febre, que precisamente presentou a semana pasada na Fundación Torrente Ballester de Compostela. Tamén estou á espera de conseguir a última novidade da Editorial Alvarellos, Madia Leva!, do lugués Antón Grande, que conta cunha das mellores portadas –cortesía de Quique Bordell- que teño visto en moito tempo. Ou o Ratas en Manhatan de Francisco Álvarez ou Em tránsito de Raquel Miragaia.
Galicia é unha terra onde sempre se cultivou o conto ou o relato curto. Poden ser as longas noites ao carón da lareira ou diante dun licor café e unha baralla de cartas. Ou pode que sexa a climatoloxía de brumas, choiva e escuridade, que tanto inflúe no inconsciente e na consciencia e fai ver nas mentes de soñadores meigas e tesouros. O certo é que sempre estivo na sociedade galega esa necesidade de contar historias, de escoitalas e de transmitilas.
Galicia foi berce dos mellores contistas, persoas que recolleron lendas e historias que sementaron os nosos devenceiros durante séculos e xeracións, adaptándoas e ofrecéndonolas como breves agasallos. Así temos a Ánxel Fole, Álvaro Cunqueiro ou esa lenda viva que é Méndez Ferrín, sen querer esquecer aos Risco, Camilo Gonsar, Dieste ou a Otero Pedrayo.
E as novas, e non tan novas, xeracións de escritores están a recoller ese legado e ese amor pola historia breve. Xunto os escritores novos máis prometedores –Samuel Solleiro, Alberte Momán ou Mario Regueira, por indicar algúns-, os máis consagrados tamén cultivaron o relato e publicaron libros deste xénero. Así están Un millón de vacas ou As chamadas perdidas de Manuel Rivas, Caixón desastre e Polaroid de Suso de Toro ou Irmán Rei Artur de Carlos G. Reigosa.
Pódese decir que a temática e a situación dos contos ten trocado. A luz da lareira e os tallos de madeira deveu en luz de lámpada e agarimoso sofá. A muller loba do relato de Vicente Risco xa non vagabundea polos bosques de carballos, senon que ouvea nos peores antros das nosas cidades. O que non mudou é esa necesidade de contar, de escoitar e de transmitir.