A Asociación de Escritores en Lingua Galega (AELG), co patrocinio da Fundación Cidade da Cultura de Galicia e Consellería de Cultura e Turismo, organizan para este sábado no Auditorio da Biblioteca da Cidade da Cultura de Galicia, en Santiago de Compostela, a xornada Vover a Castelao.
A xornada abranguerá a súa obra literaria, gráfica, pictórica e o seu papel na construción da nación, cuxa divulgación serve para reivindicar socialmente a súa palabra e achegala á cidadanía en xeral e ás novas xeracións en particular.
Na obra literaria de Castelao, escrita na súa integridade en galego e para o lectorado galego, a súa narrativa e o seu teatro impreso levan a nosa literatura a entraren na modernidade, ao paso da historia das literaturas pioneiras do século XX. A respecto da súa obra gráfica e pictórica, é mester recoñecérmola habitada pola omnipresente conciencia galeguizadora, polo pensamento analítico que nos explica a nós mesmos e que descobre perante nós, e ante os demais, a complexidade desde o noso estarmos no mundo, do noso pensármonos no mundo. A súa escrita de reflexión política, como acrisolamento do seu pensamento, nace e medra da análise da totalidade da problemática dos galegos e da súa praxe na actividade política, na defensa insubornábel dos intereses do pobo galego, da súa lingua, da súa economía, da concreción, en definitiva, de todo aquilo que nos define como pobo diferenciado, que ten que construír como tal o seu futuro.
A xornada comezará ás 10.30 h. coa conferencia do historiador e catedrático da USC Xusto Beramendi Castelao e a construción da nación.
De seguido o escritor, político e estudoso da obra de Castelao Manuel Rei Romero falará intervirá coa palestra De Rosalía a Castelao.
Tras unha pausa para o café Xoan Costa e Inma López Silva intervirán na mesa redonda Castelao ao pé da letra.
Tras o almorzo, a xornada sobre Castelao rematará cunha nova mesa redonda titulada Castelao e a arte do pensamento social, na que estraán os humoristas gráficos Siro López e Xosé Lois “O Carrabouxo”.
A entrada para esta xornada Volver a Castelao é de libre e de balde.
Un oeil de verre
Estes días chega ás librerías do mundo francófono, editado en Les Fondeurs de Briques, o libro de Castelao, orixinal de 1922, Un ollo de vidro. Memorias dun esquelete en tradución directamente do galego de Vincent Ozanam. Para o seu traballo, o tradutor seguiu a edición publicada por Galaxia da obra dentro da Biblioteca Castelao que dedicamos ao autor de Rianxo. O libro chega ás librerías de Francia coas ilustracións do propio Castelao.