Todo é silencio (Xerais), a máis recente novela de Manuel Rivas, será publicada nas vindeiras datas en francés pola editorial Gallimard e en inglés por Harvill Secker, selo de Random House. Nesta mesma editorial publicouse, no pasado mes de febreiro, a edición de peto de Os libros arden mal (Books Burn Badly) na Colección Vintage, logo da gran acollida da edición en tapa dura aparecida hai un ano.

O éxito de Todo é silencio confírmase no noso país coa aparición, nestes días, da segunda edición da novela, aparecida no pasado mes de outubro cunha tirada de 12.000 exemplares.