A IV Semana da Poesía Salvaxe de Ferrol arrancará hoxe mércores ás 18.30 horas no Cantón de Molíns. Durante catro días, as rúas, prazas, mercados, pubs e instalacións municipais como os Mercados da Magdalena e de Recimil ou a Biblioteca Municipal da Praza de España encheranse de lecturas ao aire libre, actuacións musicais e recitais de poemas da man de destacados poetas e escritores de Galicia, doutros puntos de España e mesmo de Portugal. A programación foi presentada en rolda de prensa polo asesor cultural do Concello, Roberto Taboada, e os poetas Guillermo Ferrández e Karlotti, quen deron conta das actividades deseñadas no marco deste proxecto que, por cuarto ano consecutivo, porá a palabra poética “salvaxemente e sen intermediarios” en diferentes espazos da cidade, devolvendo a palabra aos seus auténticos donos -as persoas-, convertindo á urbe naval nun novo referente indispensable da actividade cultural do país, especialmente da poética.
A IV Semana de Poesía Salvaxe iniciarase ás 18.30 h. no Cantón de Molíns, da man de Guillermo Ferrández, Víctor M. Díez e Juan Carlos Valle “Karlotty”, que compartirán a súa obra cos cidadáns e cidadás. Nesta mesma xornada, e ás 23.00 h., o Bar Os Cazadores, ubicado na rúa Magdalena, acollerá unha actuación do músico e poeta O Leo, que ofrecerá os seus “poemas dos escombros en flor”.
A segunda xornada -a de mañá xoves- celebrarase en numerosos escenarios, sendo o Mercado da Magdalena ás 11.30 h. coa poeta Olga Novo, que fará unha lectura dos seus poemas, precedida pola música de Los Gatos. Na praza do Inferniño, ás 18.00 h., todos os poetas participantes nesta Semana Salvaxe intervirán con lecturas e músicas sendo a palabra a materia prima por excelencia nunha “Poeticasession” e, finalmente, ás 23.00 h., na Sala Súper 8, celebrarase un recital de poemas a cargo do poeta, letrista do grupo La Naifa e Línea del Frente, vocalista e letrista do grupo Los Inspectores e editor Tiago Gomes (Lisboa, 1971) e Pedro Moura.
Canto ao programa do venres, as actividades comenzarán no Mercado de Recimil ás 11.30 h. cunha lectura dos poetas Víctor M. Díez, Karlotti e ás 13.00 h. celebrarase un pasarrúas “coa palabra encarnada” desde o Mercado ata a rúa do Sol. Pola tarde, ás 18.30 h., a Biblioteca Municipal da Praza de España acollerá un recital de poemas de María do Cebreiro (Santiago, 1976). Na Praza de Canido, ás 20.00 h., haberá unha actuación do colectivo e asociación cultural ALG-A, que terá continuidade ás 23.00 h. no Pub Carteles, onde intervirán improvisadamente todos os poetas desta IV Semana da Poesía Salvaxe xunto con Tiago, Al Vidal, Eli Quartet e Günter Heinz.
A IV Semana da Poesía Salvaxe de Ferrol chegará ao seu remate na xornada do sábado con Carlos Oroza, que ofrecerá un recital poético ás 13.00 h. no Pub Cazadores e ás 20.00 h., na Capela do Torrente Ballester haberá unha actuación do músico Günter Heinz -trombón de varas- , coa voz de Vanessa Vidal. Ás 22.30 h. as actividades trasladaranse novamente ao Pub Carteles, onde terá lugar a clausura desta semana cultural.