Unha parte do legado de Alfredo Brañas regresou a Carballo, a vila onde naceu e onde pasou os primeiros anos da súa vida. Libros, fotografías e cartas recompiladas polo seu sobriño-neto Santiago González-Brañas convértense en patrimonio público grazas á cesión realizada ao Concello de Carballo para que vele pola súa preservación. Todo ese material será clasificado e inventariado para darlle o mellor uso posible e poñelo ao alcance da sociedade.
Nesas caixas de cartón atópanse, por exemplo, as cartas que Alfredo Brañas escribía a diario á súa nai, pero tamén correspondencia que mantiña con outros autores da época, como Manuel Murguía, libros ou fotografías.
Alfredo Brañas naceu en Carballo en 1859. En 1889 publica en Barcelona El Regionalismo. Estudio sociológico, histórico y literario, que foi aceptada por todos os sectores do galeguismo como un referente. En 1890 déuselle unha homenaxe en Santiago, que supuxo a primeira xuntanza de todos os galeguistas nun ambiente de unidade, independentemente das diferentes tendencias nas que se dividía, e constituíu o punto de partida da mobilización rexionalista. Brañas foi concelleiro en Santiago entre 1890 e 1891, e en 1890 participa na creación da Asociación Regionalista Gallega (ARG) e escribe no seu voceiro, La Patria Gallega, no que Brañas fala por primeira vez de Galicia como nacionalidade. O rexionalismo de Brañas baseábase nun catolicismo e un historismo tradicionalista que lle serve para reclamar as liberdades antigas, ao tempo que arremete contra a industrialización, o liberalismo e o capitalismo, reclamando a volta aos gremios. Alfredo Brañas falecerá con tan só 40 anos. Os seus restos repousan no Panteón de Galegos Ilustres.