O autor ourensán Xosé Manuel Pacho Blanco, coa obra titulada Paraísos, gañou o V Premio Diario Cultural de Teatro Radiofónico nas súas dúas categorías, ao recibir por unanimidade o premio do xurado e sumar o maior número de votos emitidos polo público, o que lle valeu tamén o premio da audiencia. O galardón, que convoca anualmente a Radio Galega co patrocinio da Agadic (Axencia Galega das Industrias Culturais) e a colaboración do Centro Dramático Galego (CDG), seralle entregado o vindeiro 3 de maio dentro do espazo radioescénico que se desenvolverá no Salón Teatro de Santiago de Compostela.
O texto e a dramatización da obra gañadora serán editados nun libro-cd xunto aos outros tres títulos finalistas, que na presente edición do Premio foron: Como eliminar as manchas de vómito, de Eva Freixeira, Carne de canón, de Rebeca Montero, e Señora Carme, de Manuel Román.
No seu ditame, o tribunal subliñou "o carácter aberto do texto da obra gañadora, así como a mestura e dominio de rexistros e modalidades, tanto da lingua oral como da escrita, e o intelixente uso da tradición radiofónica de programas dramáticos". Mencionou tamén expresamente "o adecuado aproveitamento dos recursos do medio radiofónico e o uso do fragmento, da cita e a suxestión como elementos dramáticos".
O xurado estivo composto por Ana Vallés, dramaturga e directora de teatro; Vanesa Martínez Sotelo, dramaturga e gañadora do premio do xurado do IV Premio Diario Cultural de Teatro Radiofónico; Camilo Franco, crítico teatral; Ana Rosales, responsable de comunicación da Agadic; e Ana Romaní e Anxo Quintela, directora e redactor respectivamente do Diario Cultural.
Xosé Manuel Pacho Blanco naceu en Ourense en 1974. Avogado e profesor na Universidade de Vigo, recibiu no ano 2007 o Premio de Narrativa Torrente Ballester coa súa primeira novela A choiva do mundo, publicada pola editorial Galaxia.
A presentación do libro-cd e a entrega do premio terá lugar o vindeiro día 3 de maio no seo dunha nova edición do denominado espazo radioescénico, que este ano se desenvolverá no Salón Teatro de Santiago de Compostela e que contará coa colaboración do CDG para a súa organización. As catro obras emitíronse en diferentes programas da Radio Galega entre o 7 e o 25 de marzo. Dirixidas por Ana Vallés, foron interpretadas por Nuria Sanz, Margarita Fernández, Mónica Caamaño, Marcos Viéitez, Roberto Leal, Manu Lago, Laura Ponte e Xosé Manuel Olveira "Pico". Iván Nogueira foi o responsable da realización sonora.
O Premio Diario Cultural de Teatro Radiofónico pretende fomentar a escrita de textos dramáticos para a radio, facilitar o diálogo entre a dramaturxia contemporánea e o medio radiofónico, divulgar a escrita teatral galega e contribuír á recuperación desde unha perspectiva contemporánea do xénero do teatro radiofónico.
