Este sábado finou en Lugo Nicandro Ares Vázquez, sacerdote e filólogo. Ares Vázquez nacera na parroquia lucense de Santalla de Bóveda de Mera no ano 1926. Membro correspondente da Real Academia Galega desde 2006, foi un grande estudoso da toponimia e un dos maiores especialistas no complexo monumental da súa localidade natal.

Ordenouse sacerdote en 1951. Cursou estudos de teoloxía e filosofía, sentindo interese polas linguas clásicas. Foi profesor de teoloxía no Seminario de Lugo desde 1955 durante 42 anos. A partir de 1964 comeza a publicar artigos referidos a temas históricos e onomásticos, seguindo os pasos do seu mestre Francisco Vázquez Saco, tarefa na que destacou, tendo publicado múltiples estudos á toponimia da diocese de Lugo.

Ao longo da súa vida publicou máis dun milleiros de artigos en xornais e revistas. A Real Academia Galega recolleu 178 dos traballos da súa obra toponímica, ata o momento dispersos, en dous volumes saídos do prelo en 2011 e 2013.