O padroado da Fundación do Pedrón de Ouro acordou recoñecer a exemplar traxectoria vital e conceder o Pedrón de Ouro 2011 á sindicalista labrega Lidia Senra. Na mesma reunión decidiu outorgar o Pedrón de Honra 2011 aos profesores de Filoloxía Latina da Universidade de Granada, Aurora López e Andrés Pociña, pola súa traxectoria de escritores, estudosos e divulgadores da cultura e lingua galega.
Lidia Senra, líder indiscutible do sindicalismo labrego galego, feminista galega e referencia obrigada dentro do movemento agrario europeo e internacional, naceu en casa labrega da Pobra do Brollón (1958), comezou a participar desde moi nova nas loitas e no sindicalismo labrego a través dos Comités de Apoio á Loita labrega, das Comisións Labregas, da loita contra a cota da Seguridade Social Agraria e da cota do leite. Desde 1989 ata 2007 ocupou o cargo de secretaria xeral do Sindicato Labrego Galego. Con este recoñecemento, o Pedrón de Ouro tamén quere visibilizar e valorar o traballo colectivo das mulleres labregas de Galicia. Recentemente edicións Laiovento o libro Lidia Senra. Historia dun liderado entrañable, escrito por Tareixa Ledo Regal.
Andrés Pociña e Aurora López reciben os Pedróns de Honra pola súa decidida proposta a prol da Lingua e Cultura Galegas a través das súas iniciativas desde a Universidade de Granada, e moi especialmente polos seus traballos sobre a obra e pensamento de Rosalía (Rosalía de Castro. Documentación biográfica y bibliografía crítica (1937-1990), 3 vol. A Coruña, 1991-1993; edición crítica de Cantares Gallegos, Santiago, 1992; Rosalía de Castro. Estudios sobre a vida e a obra, Santiago, 2000; Conversas con Maruxa Villanueva, A Coruña, 1995, etc.). Son tamén de importancia as súas aportacións e publicacións en distintos xornais e revistas que inciden nos debates públicos ao redor da nosa identidade galega e a súa incidencia importante no mundo cultural europeo.
O Pedrón de Ouro trata de sobrancear aquela personalidade ou entidade viva e residente en Galicia que máis se teña destacado na defensa e promoción das diversas facetas da cultura nacional ao longo do ano ou na traxectoria dunha vida. Co Pedrón de Honra, a Fundación pretende distinguir a personalidade ou entidade viva, galega ou non, residente fóra da Terra que se destacase coas súas achegas ao engrandecemento da Nación e a súa Cultura.
O acto de entrega da 48ª edición do Pedrón de Ouro terá lugar o próximo 29 de maio nun acto literario que se celebrará na Casa Museo de Rosalía, en Padrón, ás 12.30 h., no que actuará de mantedor o escritor David Otero, secretario da Fundación do Pedrón de Ouro.
