O Centro Recreativo de Artes de Riveira acolleu a presentación do libro O Patrimonio Etnográfico e Arqueolóxico do Barbanza e de Porto do Son, editado polo Concello de Riveira coa colaboración do Museo Etnográfico de Artes.
A obra está escrita por Ledicia Lustres Viturro, licenciada en historia pola Universidade de Santiago, quen participou na presentación, xunto co alcalde nx0woé Luis Torres Colomer; o edil de Cultura Luciano Fernández Martínez; e o presidente do Museo Etnográfico, Manuel Reiriz Dios.
Ao longo de 200 páxinas, Ledicia Lustres quixo presentar dun xeito estruturado unha relación exhaustiva dos bens de carácter arqueolóxico e etnográfico existentes nos concellos de Riveira, A Pobra do Caramiñal, Boiro, Rianxo e Porto do Son, tales como petróglifos, dolmens, menhires, pombais, cruceiros, petos de ánimas, muíños ou hórreos. Deste xeito preténdese preservar e poñer en valor a riqueza histórica da comarca. Segundo manifestou Manuel Reiriz Dios, a intención da entidade veciñal que preside é a de seguir catalogando e divulgando o patrimonio dos cinco concellos citados, a través dunha ulterior publicación complementaria que incida noutro tipo de elementos, como igrexas, capelas ou pazos.
Patrimonio Galego
Ao fío da nova da publicación de O Patrimonio Etnográfico e Arqueolóxico do Barbanza e de Porto do Son é de obrigado cumprimento informar da aparición da web patrimoniogalego.net, un loable traballo cooperativo que integra nunha web información sobre o Patrimonio Cultural Galego. Segundo se informa en dita web, tratáse de elaborar un Catálogo Social do Patrimonio Cultural estruturado por comarcas, concellos, pero no que tamén se pode recuperar a información por tipo de ben cultural, por cronoloxía… Unha Wikipedia do Patrimonio.