A escritora compostelá Inma López Silva representará á literatura galega no Festival Literario de Hyderabad, un evento que se desenvolverá no sur da India entre os días 26 e 28 de xaneiro, e onde o estado español será o convidado desta edición.

O Festival Literario de Hyderabad é un evento anual, multidisciplinar e multilingüe que atrae a centos de creadores de India e do estranxeiro. Creado en 2010, o festival tense consolidado como unha das citas literarias máis relevantes do país, cun programa que inclúe charlas, mesas redondas, obradoiros, presentacións de libros, exposicións e eventos culturais dirixidos tanto ao público especialista como ao xeral.

Organizado polo “Hyderabad Literary Trust” en colaboración co Goberno de Telangana e o apoio de varias institucións culturais, o festival acolle como invitado de honra en 2018 ao estado español. O programa está comisariado por Alexandra Büchler ("Literatures across frontiers") e Davis López-del Amo ("Axencia Literaria Sinicus"). Ata Hyderabad irán representantes de varias literaturas, acompañando á galega López Silva estarán o catalán Alejandro Palomas, o euscaldún Harkaitz Cano, a leonesa Ana Cristina Herreros ou a madrileña Mercedes Cebrián, entre outras.

Co gallo de aproveitar a presenza na India destes profesionais, moitos destes escritores participarán posteriormente noutros festivais e eventos literarios como o festival KALAM en Calcuta, o  Kerala Literary Festival, un obradoiro de autores infantís na Fundación Vani Prakashan  e actividades en Universidades de Delhi e do Instituto Cervantes desa cidade.