O ourensán Diego Ameixeiras ven de gañar o Premio de Novela por Entregas de La Voz de Galicia. A novela titúlase Historias de Oregón e, segundo lemos nas páxinas do xornal, "ten como paisaxe a cidade de Ourense durante un verán, travestida en Oregón, pero coa xeografía e topónimos auténticos. Diego Ameixeiras gañou o premio cunha historia na que se cruzan varias vidas en situacións habituais nos informativos. Deste xeito, na obra aparecen integrantes de brigadas antiincendios cambiados de bando, mulleres maltratadas, inmigrantes solidarios, parellas que están en vías de extinción, moitos bares de menú do día, todo nun crebacabezas que se vai compoñendo desde a fragmentación inicial.".

Historias de Oregón poderá lerse ao longo do mes de agosto nas páxinas de La Voz de Galicia.