A Federación de Libreiros de Galicia celebrou o pasado sábado na localidade coruñesa de Narón a festa da entrega dos XX Premios Irmandade do Libro. Ao acto asistiron, ademais dos responsables da entidade organizadora, o alcalde e membros da corporación municipal de Narón, o presidente do Consello da Cultura Galega, o Secretario Xeral de Política Lingüística, o Director Xeral do Libro, Bibliotecas e Arquivos, o presidente da Asociación Galega de Escritores, o presidente do PEN Club de Galicia, o presidente de ANELE, o presidente do Cluster Libro, o vicepresidente de CEGAL, escritores, editores, distribuidores, libreiros e representantes do mundo das artes e da comunicación. A mantedora do acto foi a escritora ferrolá Rosa Aneiros e o encargado da apertura cultural do mesmo, foi o xornalista Xosé Manuel Pereiro.
As candidaturas presentadas a estes premios, foron numerosas en todas as modalidades. Unha vez avaliadas, as decisións dos xurados e as súas consideracións foron as seguintes:
Institucións. Pola especial contribución ao coñecemento e valoración do libro infantil e xuvenil en galego dende o ano 1989 ata o momento actual, tanto dentro de Galicia como fóra e pola creación de novos lectores, o xurado dos XX Premios Irmandade do Libro decidiu dar como gañador na modalidade de Institucións a: Asociación Galega do Libro Infantil e Xuvenil (GÁLIX).
Fomento da Lectura. Polo traballo de promoción cultural no ámbito rural, polo fomento da lectura que leva a cabo a súa biblioteca, pola aposta polos xéneros de poesía e teatro a través dos seus premios “Arume” e “Estornela”e como recoñecemento ao traballo de Anisia Miranda ao longo dos últimos anos, o Xurado dos XX Premios Irmandade do Libro decidiu dar como gañado á: Fundación Neira Vilas, de Gres (Vila de Cruces).
Obra editorial do ano 2010. Pola súa aposta por un xénero minoritario, como é a poesía, tanto no ámbito nacional como da traducción de autores estranxeiros, e moi especialmente polo descubrimento e aposta cara a autores radicalmente contemporáneos como Lois Pereiro, o Xurado dos XX Premios Irmandade do Libro decidiu dar como gañador, na modalidade de Obra Editorial do ano 2010 á: Colección Di-Versos, de edicións Positivas.
Libro do ano 2010. Pola excelente acollida no público lector e pola súa aposta por unha literatura comercial e de calidade, o Xurado dos XX Premios Irmandade do Libro decidiu dar como gañador, na modalidade de Libro do Ano 2010 a: Asasinato no Consello Nacional (Xerais) de Diego Ameixeiras.
Centros de Ensino. Pola orixinalidade das súas propostas, polo entusiasmo amosado na práctica diaria do club de lectura e a constancia na difusión da lectura entre a mocidade, o Xurado dos XX Premios Irmandade do Libro decidiu dar como gañador na modalidade de Centros de Ensino ao: IES Xesús Taboada Chivite, de Verín.
Libraría. Pola súa producción interdisciplinar, pola contribución á difusión do libro a través da súa grande actividade cultural na propia libraría, o Xurado dos XX Premios Irmandade do Libro decidiu dar como gañadora na modalidade de Librarías a: Libraría AENEA de Santiago de Compostela.
Autor. Pola súa traxectoria en defensa do libro e da lectura en galego, pola súa paixón como editor e pola solidez e calidade do seu universo narrativo, moi vencellada aos mellores mestres da tradición galega, o Xurado dos XX Premios Irmandade do Libro decidiu dar como gañador na modalidade de Autor a: Víctor F. Freixanes.
