Antón Lopo, co poemario Corpo, ven de acadar o VI Premio Manuel Lueiro Rey de Poesía, que convoca o concello de Fornelos de Montes dende 2012.
O xurado estivo constituído Luís Cochón, en calidade de presidente, e mais os vogais Silvia Penas, Mercedes Queixas, Armando Requeixo e Ramón Rozas amais de por Carmen Carreiro, presidenta da Asociación Cultural O Cruceiro da Laxe, que actuou como secretaria con voz e sen voto.
O xurado resaltou o bo nivel dos 32 orixinais recibidos, así como a súa diversidade tanto estilística coma temática. De Corpo destacou o xurado o feito de ser un excelente poemario, denso por variado ―tocata e fuga ―, que se compón de diversas suites que se completan ou se enfrontan ou se escisionan (eses parénteses e claudátores). O autor constrúe este Corpo medrado con poder de convicción tanto que convenceu, unánime, os cinco membros do xurado. Ponderado, pousado, serán versos para quedar, no tempo que nos acolla, cando menos neste libro admirable.
Ademais da cantidade económica establecida nas bases do concurso, Antón Lopo verá publicado a obra gañadora na editorial Xerais, responsable da publicación do volume gañador, que será presentado publicamente a comezos do vindeiro mes de abril, en data coincidente co natalicio de Lueiro Rey, nun acto de entrega do premio en Fornelos de Montes.
O monfortino Antón Lopo é escritor, xornalista e actor. As súas obras abranguen dende a poesía ata a narrativa, pasando polo teatro, o ensaio e ten traducido ao galego a Óscar Wilde. Actualmente é editor do selo especializado en poesía Chan da Pólvora.