Hordas de escritura (Xerais, 2008) de Chus Pato é o mellor libro de poesía da década, segundo indicou o xurado do Premio Mondoñedo 10 deste ano, integrado por representantes das entidades literarias e vinculadas ao mundo do libro de Galicia. O xurado recoñece a importancia dunha obra "con vocación experimental" na que a poeta "intenta artellar un discurso de colectividade na liña da poesía moderna escapando do suxeito lírico individual", así como a vontade de Hordas de escritura de "superar os límites da linguaxe poética convencional, transgredindo os xénero literarios" e considera este título "un paso adiante no proxecto de indagación das posibilidades da linguaxe poética que a autora desenvolve".
Os membros do xurado seleccionaron outros once títulos finalistas: Atravesar o fantasma de Carlos Callón (Xerais, 2014), Celebración (Apiario, 2014) de Gonzalo Hermo, Cráter (Toxosoutos, 2011) de Olga Novo, Duración da penumbra (Centro PEN Galicia, Xunta de Galicia, Afundación, 2016) de Miguel Anxo Fernán Vello, Estirpe de sombras (Editorial Barbantesa, 2014) de Raida Rodríguez Mosquera, Estúrdiga materia (Galaxia, 2008) de Luís González Tosar, Eu violei o lobo feroz (Através Editora, 2013) de Teresa Moure, Carne de Leviatán (Galaxia, 2013) da propia Chus Pato, Leopardo son (Espiral Maior, 2011) de Pilar Pallarés, Os ángulos da brasa (Kalandraka, 2011) de Manuel Álvarez Torneiro, Profundidade de campo (Espiral Maior, 2007) de Yolanda Castaño e Sextinario: trinta e seis +tres (Sotelo Blanco, 2007) de Marica Campo.
Hordas de escritura, que xa acadar o Premio da Crítica, 2008 (poesía) e Premio Losada Diéguez 2009 (Creación Literaria), é a terceira entrega dunha pentaloxía que Chus Pato vén construíndo baixo o título xenérico de Método. Pero, cando o poema se compón, só lle é fiel a súa propia cicatriz; esa é a lei e a gravidade do texto. Un libro importante dunha das máis abisais, mutantes, imprescindibles e rupturistas escritas do panorama poético contemporáneo.
A Asociación “As San Lucas”, en colaboración co Colectivo Mondoñedo É … e o concello de Mondoñedo crearon no 2016 estes premios co obxectivo de establecer vínculos permanentes entre a cidade e o concello que lles dá nome coas mellores obras de creación cultural producidas en Galicia e en galego na actualidade. Na primeira edición, dedicada á narrativa, a obra gañadora foi Os libros arden mal (Xerais) de Manuel Rivas. Para o 2018 escollerase a mellor obra de Teatro en galego, estreada ou publicada entre os anos 2008 e 2017.
O acto de entrega a Chus Pato será este domingo 22 de outubro nun acto que principiará ás 12.30 h. e que tamén rememorarase a homenaxe a Pascual Veiga que se celebrou en Mondoñedo no ano 1917 e da constitución da Sección mindoniense das Irmandades da Fala.