Cambados inaugurou onte a súa Feira do libro, que permanecerá aberta ao público no Paseo da Calzada ata o día 22 de xuño.

Trátase dunha cita que regresa á vila pontevedresa por primeira vez en máis de dúas décadas e que constitúe un evento de referencia para autores e lectores.

Cambados é a novena parada do calendario destas feiras e o seu programa inclúe presentacións de libros, charlas coloquios, concertos e actividades infantís.

Tras o pregón inaugural a cargo do escritor Ramón Caride, ao longo dos catro días de Feira do libro pasarán por Cambados escritoras e escritores como Susana Sáncez Arins, María Eiras, Sindo Mosteiro, Pepe Barro, Ledicia Costas, Manuel Portas, Fran Alonso ou Antonio Magariños, entre outras, que estarán presentando os seus libros máis recentes.

O horario da Feira do Libro de Cambados sería de 10.30 h. a 13.30 h. e de 17.00 h. a 21.00 h. Os sábados de 11.00 h. a 14.00 h. e de 18.00 h. a 22.00 h.

As visitantes poderán adquirir as últimas novidades nas casetas das librarías participantes, que nesta edición son a libraría Pedreira, A serpe edicións, Contos, Cortizas, Nobel Cambados, Cartabón, Lafer, AENEA, Ramón Cabanillas e a Biblioteca municipal Luís Rei.

Como decote acontece nestas Feiras, todos ls libros terán un desconto do 10%.