Este domingo 18 de marzo terá lugar unha nova edición do proxecto Libros a monte, iniciativa posta en marcha o pasado verán pola plataforma feminista A Sega e que ten como obxectivo fomentar a cultura do libro e visibilizar a creación feita por mulleres. A xornada, que terá lugar este domingo na Fundación Luis Seoane, renderá homenaxe ás Mulleres libres e libertarias da Coruña a través de numerosas charlas, obradoiros, proxeccións e espectáculos dirixidos a todos os públicos que se desenvolverán, ao longo de todo o día, desde as 11.30 h.
A intención deste evento monográfico é rescatar a memoria dunha cidade en feminino, á vez que se visibilizan figuras históricas coruñesas como María Casares, Chelo Rodríguez ou La Corales. A primeira das actividades, que terá lugar entre as 11.00 h. e as 11.30 h., será un roteiro virtual polas casas de acollida anarquistas do barrio das Atochas. De seguido, presentarase Arte+muller+Galicia, documental de Rosario Sarmiento, e comezará unha dupla programación dirixida, por unha banda, ao público adulto -que inclúe a presentación do poemario O único lugar onde ficar inmóbil, de Arancha Nogueira ou a colección Mulleres Bravas da nosa historia, de Urco editora-, e, por outra, ás nenas e nenos, con contacontos de Mercedes Queixas e Saleta Fernández.
Xa pola tarde, a partires das 16.00 h., na programación infantil sucederanse obradoiros -que porán en relación a imaxe e a palabra- e contacontos, mentres que o público adulto poderá asistir á proxección do documental As silenciadas, a un recital poético de diversas voces o a un obradoiro de pintura e poesía.
Mulleres libres e libertarias, que tamén conta co apoio do Concello da Coruña, da Asociación Cultural Alexandre Bóveda e da Deputación da Coruña, pecharase ás 19.00 h. cun concerto de Su Garrido Pombo.